Sakras Art Gallery

Sekuenca filmike

RTK

TOP CHANNEL

RTV 21

ALSAT

TV KLAN

KLAN KOSOVA

BOTA.AL

ALBANIAPRESS

ALBINFO

EXPRESS

KOHA DITORE

ZËRI INFO

KOSOVA SOT

INSAJDERI

BOTA SOT

GAZETA METRO

GAZETA SINJALI

ALBANIAN POST

KALLXO COM

LAPSI.AL

ZEMRASHQIPTARE

KOSOVA PRESS

TELEGRAFI

EUROPA E LIRË

ZËRI I AMERIKËS

PSIKOLOGJIA

TRIBUNA SHQIPTARE

SHËNDETI

DITURIA

PRESHEVA.COM

GJUHA SHQIPE

KOSOVARJA

RADIOPROJEKT

ADEM ABDULLAHU

          Një ndër krijimtaritë më të lëvruara të letërsisë shqiptare, është edhe POEZIA. Gjini e letërsisë ku bota e brendshme, ndjenjat më sublime, frymëzimi hyjnor...  shprehen përmes shkronjave të cilat krijojnë vargje... vargjet, pastaj, shpalosin mendime, mendimet krijojnë energji, energjia ndez dritat e dijës, rrezet e artë të së cilës i japin ngrohtësi zemrës, mendjes dhe shpirtit, e me këtë, edhe kuptim dhuratës më të shtrenjtë, vetë  jetës.

            Që nga Lekë Matrënga e Pjetër Budi, kjo energji nuk u ndalë asnjëherë së hedhuri farën e dijës, duke e kultivuar atë me dashurinë më të çiltër në shpirtin e pastër e fisnik të popullit shqiptarë. Duke i mposhtur të gjitha sfidat e kohës, kjo frymë e shpirtit të popullit, xixat e saja të arta, si një pishtar i shpresës, u bartën gojë më gojë, mendje më mendje, zemër më zemër... brez pas brezi... nga kokat më të ndritura të kombit si: Naimi, Çajupi, Mjeda, Asdreni, Shiroka... për të vazhduar tek Fishta, Konica, Noli, Migjeni... e deri në kohën tonë, duke u kthyer ai pishtarë në flakadan të përhershëm që tashmë nuk ka forcë në botë që mund ta shuaj fuqinë e zjarrit të tij...

            Dua ta falënderoj nga zemra mikun tim dhe poetin e mirënjohur, ADEM ZAPLLUZHA, që me përkushtim të jashtëzakonshëm, vizitorëve të kësaj faqeje, por edhe më gjerë, do t’ua prezantoj disa nga poetët më të njohur të kohës sonë, e me këtë, do e plotësoj e pasuroj edhe mozaikun e mrekullueshëm të letërsisë shqiptare.

(www.sa-kra.ch)

       Përgatiti: Adem ZAPLLUZHA

ANTOLOGJI E POEZISË MODERNE SHQIPE

ADEM ABDULLAHU

            Hyrje

          U lind më 10.09.1964, në Shipkovicë të Tetovës, R. e Maqedonisë. Punon mësues në vendlindje. Ka mbaruar Akademinë Pedagogjike në Shkup, Fakultetin Pedagogjik në Shkup dhe magjistraturën në Fakultetin Filozofik, Programi Studimor: Pedagogji në Tetovë.

            Ka filluar të botojë që nga viti 1985 nëpër revista e gazeta të kohës. Është fitues i çmimit të III-të në Takimet poetike të Karadakut në Kumanovë. Ka fituar çmime të ndryshme letrare në Maqedoni, me librin “Svilenite nasmevki na lubovta” - (Buzëqeshjet e mëndafshta të dashurisë), libër i botuar në dy gjuhë: maqedonisht dhe arumanisht, vendin e II-të në konkurs në nivel të vendit. Ka fituar çmimin e III-të në takimet poetike të Korçës, Shqipëri dhe një varg diplomash e mirënjohjesh letrare. Shkruan poezi dhe prozë. Është pjesëmarrës në shumë konkurse letrare dhe fitues çmimesh. Është anëtar i Lidhjes së Shkrimtarëve Shqiptarë në Maqedoni. Anëtar i klubit të shkrimtarëve “Oeneum“ në Tetovë.

            Që më shumë se 15 vjet boton revistën letrare për fëmijë YLBERI plus në Tetovë.

            Ka të botuara këto vepra:

            ECJA VERTIKALE - poezi, Naim Frashëri, 1993 Tiranë.

            ARADHA E SHKRONJAVE - poemë për fëmijë, 1994 Tetovë, e ribotuar disa herë.

            DETI DHE KULLA - skica, tregime e përralla, 1996 Tetovë.

            LOTËT E LULEVE - poezi, 1997 Tetovë.

            KATI I TRETË - tregime për të rritur, 1999 Tetovë.

            BUKURIA PËR DHEMBJE - prozë, 1999 Tetovë.

            TRIDHJETË E GJASHTË KALLËZIME E NJË  PËRRALLËZ - kallëzime popullore, 2000 Tetovë.

            TË TRETË - pjesë skenike për fëmijë, 2002 Tetovë.

            TOKË E DASHURI - poezi për të rritur, 2003 Tetovë, është libri i nëntë i autorit.

            BREG LIQENI - 2005, Tetovë.

            TRIDHJETË E GJASHTË KALLËZIME, - kallëzime popullore (ribotim), 2012, Tetovë.

            TË VRASIM HESHTJEN, poezi, Tetovë, 2013.

            ASPEKTI EDUKATIV I KRIJIMTARISË POETIKE TË SHKRIMTARIT PËR FËMIJË ODHISE K. GRILLO, studim, Tetovë, 2014.

            Libri poetik “BREG LIQENI” i është përkthyer në bullgarisht dhe i botuar në faqet e internetit, pritet së shpejti të dalë si libër i shtypur.

            Autori ka përkthyer nga bullagrishtja këto libra:

            ÇARÇAFËT E BARDHË, poezi, Katia Ermenkova.

            UNIVERSI NDRIÇUES, poezi, Viktoria Ivanova. 

            LINDJA E PERËNDIMIT, poezi, Violeta Sëbeva dhe librin me kritikë teatrale:

            “TRAJNIMI I AKTORIT NË SHEKULLIN XX”, kritikë teatri, Rumiana Nikollova.

            Libra të botuara në gjuhë të tjera:

            “SVILENITE NASMEVKI NA LJUBOVTA”, (botim në gjuhën maqdonishte dhe arumanishte), Maqedoni.

            “EZEREN BRIAG” në gjuhën bullgare, Sofie, Bullgari si dhe botime e cikle poezish në ukrainisht, maqedonisht, bullgarisht, rumanisht, anglisht etj. në portale të ndryshme elektronike, gazeta, revista dhe përmbledhje antologjike.

            Disa tregime dhe poezi të autorit janë të përfshira nëpër libra shkollore, kryesisht në Maqedoni, si dhe shumë poezi për fëmijë të komponuara, të cilat këndohen nga fëmijë pjesëmarrës në festvale të këngës për fëmijë.

            Autori është përkthyes i gati të gjithë poetëve nga Bullgaria, pjesëmarrës në takimet poetike “Ditët e Naimit” në Tetovë dhe “Netët korçare të poezisë”, Korçë, Shqipëri.

            Përkthen nga gjuha kroate, bullgare, maqedone etj.

            Autori vazhdon në mënyrë paralele të botojë revistën “Ylberi plus”, të krijojë e të përkthejë.

TI QË S’E DESHE VETEN

Gjithë njerëzit e botës

urrejnë të gjallët.

Nëse i urrejnë...

Kurse ti,

që s’e deshe veten kurrë

në këtë mbretëri terri,

urren edhe të mbëltuarit nën dhe.

KOHË PA KOKË

Kohë kur mediumet rrisin autoritetin,

kur dhomat bëhen parlamente nacionale,

vendet e punës, salla pauzash.

Kohë i thënçin kësaj,

kohe pa kokë,

kur gjithçka përgojohet,

asgjë nuk afirmohet.

Le të rrisin e afirmojnë

duke shkelur e sharë,

derisa të vijë koha

e kohës me kokë.

ANEMBANË ATDHEUT

Njërin vesh kish dërguar

deri në fund të detit,

dëgjonte frymëmarrjen e anijeve

që spiranconin në port.

Me tjetrin përgjonte,

zhaurimën e avionëve

që ateronin në Rinas,

me mallin e sjellë nga larg.

Sytë shikonin horizontin...

Trupi jetonte anembanë atdheut.

KËRKOMA TRUPIN

Po s’të cingëroi telefoni

e dashur,

po s’të solli letër

postieri nga unë,

merr një kurorë në dorë,

anekënd kërkoma trupin...

ULOKU DHE I VERBËRI

Kush komandon qenien

e përsosur të natyrës,

-pyeti rrëfimtari i thinjur,

-trupi apo shpirti?!

Trupi i përngjan ulokut ,

shpirti, të verbrit!

Uloku sheh horizontin

verbëraku ecën dhe natën...

Uloku hip në qafë

udhëheq të verbrin...

I verbëri hapëron,

dëgjon e përcjell urdhra!

Uloku dhe verbëraku

ruajnë... dhe ecin..

JO

Nuk do të vetdigjem

si Jan Pallahu,

as si studentja jugkoreane,

as do të mbyllem në zgafellë

si minatorët kosovarë

që hynë në histori,

as do të orvatem të vetndezem

si studenti i Prishtinës,

as do të dal në Tien An Men

me duart zbrazur.

Do ta kërkoj rrugën time drejt lirisë!