Sakras Art Gallery

Sekuenca filmike

RTK

TOP CHANNEL

RTV 21

ALSAT

TV KLAN

KLAN KOSOVA

BOTA.AL

ALBANIAPRESS

ALBINFO

EXPRESS

KOHA DITORE

ZËRI INFO

KOSOVA SOT

INSAJDERI

BOTA SOT

GAZETA METRO

GAZETA SINJALI

ALBANIAN POST

KALLXO COM

LAPSI.AL

ZEMRASHQIPTARE

KOSOVA PRESS

TELEGRAFI

EUROPA E LIRË

ZËRI I AMERIKËS

PSIKOLOGJIA

TRIBUNA SHQIPTARE

SHËNDETI

DITURIA

PRESHEVA.COM

GJUHA SHQIPE

KOSOVARJA

RADIOPROJEKT

ARQILE V GJATA

          Një ndër krijimtaritë më të lëvruara të letërsisë shqiptare, është edhe POEZIA. Gjini e letërsisë ku bota e brendshme, ndjenjat më sublime, frymëzimi hyjnor...  shprehen përmes shkronjave të cilat krijojnë vargje... vargjet, pastaj, shpalosin mendime, mendimet krijojnë energji, energjia ndez dritat e dijës, rrezet e artë të së cilës i japin ngrohtësi zemrës, mendjes dhe shpirtit, e me këtë, edhe kuptim dhuratës më të shtrenjtë, vetë  jetës.

            Që nga Lekë Matrënga e Pjetër Budi, kjo energji nuk u ndalë asnjëherë së hedhuri farën e dijës, duke e kultivuar atë me dashurinë më të çiltër në shpirtin e pastër e fisnik të popullit shqiptarë. Duke i mposhtur të gjitha sfidat e kohës, kjo frymë e shpirtit të popullit, xixat e saja të arta, si një pishtar i shpresës, u bartën gojë më gojë, mendje më mendje, zemër më zemër... brez pas brezi... nga kokat më të ndritura të kombit si: Naimi, Çajupi, Mjeda, Asdreni, Shiroka... për të vazhduar tek Fishta, Konica, Noli, Migjeni... e deri në kohën tonë, duke u kthyer ai pishtarë në flakadan të përhershëm që tashmë nuk ka forcë në botë që mund ta shuaj fuqinë e zjarrit të tij...

            Dua ta falënderoj nga zemra mikun tim dhe poetin e mirënjohur, ADEM ZAPLLUZHA, që me përkushtim të jashtëzakonshëm, vizitorëve të kësaj faqeje, por edhe më gjerë, do t’ua prezantoj disa nga poetët më të njohur të kohës sonë, e me këtë, do e plotësoj e pasuroj edhe mozaikun e mrekullueshëm të letërsisë shqiptare.

(www.sa-kra.ch)

       Përgatiti: Adem ZAPLLUZHA

ANTOLOGJI E POEZISË MODERNE SHQIPE

ARQILE V GJATA

            Hyrje

          Arqile V. Gjata ka lindur më 24-6-1942 në qytetin e Vlorës-Shqipëri. Aty mbaroj shkollën 7 vjeçare dhe shkollën e mesme(Gjimnazin "Ali Demi") Në vitet 1972-75 vazhdoj Institutin e lartë tre vjeçar në Shkodër për Gjuhë-Letërsi Shqipe. Nga viti 1995 jeton dhe punon në Athinë. Ka bashkëpunuar dhe bashkëpunon me shtypin Shqiptarë në Athinë ku ka botuar shumë artikuj për emigracionin, reportazhe, skica, poezi, tregime dhe mendime estetike.

             Librat e botuara:

            - "Arvanitas me shumë emër "Monografi për Aristidh Kolia në vitin 2000
            - "Kur trazohet jeta" vëllim poetik viti 2005
            - "Kurorë me ngjyra" vëllim poetik 2006
            - "Qyteti që kërkon muzikë" vëllim me tregime më 2007
            - "Gratë e poetëve" vëllim me poezi  2009
            - "Një ese për jetën" vëllim me ese dhe mendime kritike më 2010 botuar nga Shtëpia Botuese "LULU" në SH.B.A
            - " Jeta më vjen si poezi" vëllim me poezi botuar nga Shtëpia Botuese "LULU" në SH.B. të Amerikës Tetor 2010
            - Vëllimi  me poezi të zgjedhura "Kur Thinje Deti" Maj 2012

            A. Gjata është bashkautor në disa Antologji dhe Revista Letrare si: Revista Letrare numër 38-të "Mehr Lict", Në Antologjinë e studiuesit dhe kritikut F.Terziu "Vëzhgim në brendësi të prozës dhe poezisë Shqiptare", Në disa numra tek Revistën letrare "Haemus" si tregime, esse dhe poezi që botohet nga Akademiku Ardian Kyçyku në Bukuresht, "Pelegrini", "Pegasi", "Çelësi i shpirtit" në Rumanisht, "Qiejt e shpirtit" si dhe bashkautor në Antologjinë "EAGLE’S VOICES" në Anglisht, që sot është pronë e Biblotekës  Mbretërore të Anglisë. Në Revistën "Obelisk".

            Ai është pasqyruar në Antologjinë me autorë vlonjat "Mendime estetike mbi letërsinë bashkëkohore" nga Eqerem Canaj

            Bashkautor në Antologjinë e krijuesve emigrant "As i gjallë dhe as i vdekur" botuar në Suedi nga Shkrimtari dhe poeti Bahtir Latifi.

            Bashkëautor në vëllimin me kujtime të Lavdie Bisha "Ti je Lulja më e Bukur e Jetës" Nëntor 2011.

            Së fundi ai është bashkautor në Antologjinë poetike "LOTËT E VIRGJËR" Mars 2012 përgatitur nga Agim Mato dhe Dr. Fatmir Terziu botuar nga Shtëpia Botuese LULU në SH. B. Amerikës.

            Poezia e tij është përkthyer anglisht, greqisht, rumanisht dhe rusisht.

BALADA E FUSTANIT TË BARDHË

Sa herë qëmtoj brengat
më rishfaqet buzëqeshja
e asaj vajze…

Dikur,
me shpresë për të ndezur
një zjarr
ëndrrat tona u copëtuan qiellit
nga goja e arnuar e kohës…

Shpesh
një pikë loti të tretur
i dhuroj tek qetësohet e harruar
thërrmuar degëve,
ngelur në sirtar këpucët e nusërisë
që askush nuk ia dhuroi.

***
Tani e shumë vite
vajza po fle
hedhur mbi vete nën rërën
e kripur të fshatit
fustanin e bardhë…

Para portës së kujtesës
nxitoj hapin e viteve,
më mbyt dëshpërimi i atyre ditëve
të asaj vajze të vrarë…

Me grushtin shtrënguar në zemrën time
përtyp lot, të hetoj dramën e asaj vajze
të uritur për një gllënjkë dashurie!

MËSUESJA IME E PARË

(Kristavgji Bano)

Nga thellësia e moteve të shkuara
dora e Mësueses
ende mi përkëdhel flokët e thinjura.
Sa herë e kujtojë Mësuesen e parë
një muze ndjenjash më ri çelet në kujtesë.

Mësuesja ime Kristavgji Bano,
herë e shohë të re me dy sytë e zinj
herë me atë blerim të kohës,
vetëm mosha e saj di ta shpjegoj botën.

Sot…
ta dëgjova përsëri zërin
më përqafove, t’i putha ato dy duar!

BASHKË ME PRANVERËN BËHEMI TRE

Poet,
ma mbushni gotën plot me verë
të ndjej frymëmarrjen e pranverës
të kap mirëseardhjen e lulëkuqeve!

Ne…
bashkë me poetët jemi natyra
jetojmë me muzikën e luleve të porsa çelura.
A nuk është sot Pranverë?

Eja vashëzë…
vishu me ngjyrat e festës
ti bashkohemi rrëfenjës intime,
për sot
syri i stinës së ngjyrave
ka zgjedhur dashurinë të recitoj!

Dritë gëzimi Pranvera
si bijë e jetës
dhe e dashura ime si sot ka lindur!
***
Në çdo gonxhe trëndafili
unë dhe poeti
bashkë me pranverën bëhemi tre!

TË GJITHA NGA PAK

Sot
të tria vaktet e ditës
i lagu nga pak
shiu rufjan.

Pak shi. Pak ftohtë,
pak zhurmë makinash.
Të gjithë nga pak lexojnë në fb-k,
nga pak i dorëzohen bukurisë së dashurisë.

Pleqtë e pallatit
nga dritaret kuvendojnë
nga pak me kopshtin
e ndodhur atje pranë.

Banorët e këtij pallati
buzëqeshin nga pak,
kështu bëjnë dhe tipat e komplikuar
kur kalojnë para portës.

Në hyrjen time 133
porta e jashtme hapet dhe mbyllet
me pak zhurmë…

GRUAJA ËNDËRRIMTARE

Ajo,
“Gruaja ëndërrimtare” sodiste veten,
ndjente ftohtë
kur mendonte se ishte aq e bukur.
Me tërë madhështinë e moshës doli nga zarfi,
si shelgu vajtues zgjati duart
në kërkim të së vërtetës…

Kishte rënë peng e vetvetes…
Këtë gjë e dinin dhe rrugicat e moteve
stina e saj ishte vetvetja
donte të bëhej pjesë e asaj ëndrre
vërtetë, ajo fluturon nga qejfi!
I thotë vetes:
-Jam e butë dhe e bukur si ëndërr!

KU SHKONI, O TË PLAKUR…?

Çapiten nëpër ajër të kohës,
kukurisin me pak zë grumbuj të moshuarish.

-Ku shkoni, o të plakur,
nëpër mjegullën e bardhë?
Jeni hallexhinj
deri në shpirt të thinjur.

* * *
Tani nuk ka lojëra për ata,
veç fjalës që ua dhurojmë
a belbëzimin e një foshnje.

Mbetur me veten,
qeshin me fytyrën plakushe të tyre
dhe ëndërrojnë kujtimet e së djeshmes
varur në kopshtin e lodrave.

Në gramë të shpirtit
ndihen pëshpërima buzësh
që dikur puthën.

Të ecin duan, diçka më tutje, ashtu,
me gjysmë fryme, ecin…

***
Dhe unë, pse i thinjur dua të hapoj,
më pëlqejnë lojërat
“Valët e Danubit” me elegancë e vallëzoj!!

PËR SHËN VALENTIN

E dashur,
në studion tonë kemi shumë letra dhe fjalë dashurie.
Ka ardhur koha,
me to të ndërtojmë Shtëpinë e fjetjes.

Mëngjeseve do përtypim mesazhet plot hire
të poezive
shkruar për buzët dhe flokët e bardha.
Gjithçka nga letërkëmbimet do i shtrojmë në tapetin e kuq
e ne të dy, futur brenda njeri-tjetrit
do vallëzojmë sonte në natën e Shën Valentini-t,
të recitojmë kujtimet
ruajtur me merak në dy gjysma zemre.
Me germat e tyre do pikturojmë të sotmen,
buzëqeshjen e dashurisë… mbi një trëndafil të kuq!