|
MIQTË PËR MIKUN
Me dëshirën që të kryejmë një detyrë që befas na
shtroi si obligim situata e krijuar, kur u dha kumti i zi se nuk frymon në
mesin tonë miku dhe krijuesi i letrave shqipe Adem Berisha, duke na lënë
fjalën dhe veprën e tij prej krijuesi dhe veprimtari të shquar në qështjen
kombëtare, një grup miqësh e bashkëveprimtarësh iu qasëm një pune jo edhe aq
të lehtë për të përjetësuar veprimtarinë e tij, duke përmbushur një obligim
që ndienim për këtë krijues të palodhshëm e shumë entuziast për moshën që
kishte, që fati e deshi t’i ndërpritej aktiviteti i tij në gjysmërrugë.
Me të mësuar për ngjarjen nuk pushuan shkrime e
telefonata, për të ngushëlluar sekush mikun a shokun, familjen a
bashkëveprimtarët që prej kohësh kishin bërë kontakte të shumta rreth
bisedave për jetën, krijimtarinë dhe problemet jetësore e politike që ishin
preokupime të tyre. Por, jo vetëm kaq, ata nuk hezituan që të hedhin idenë e
ngritjes së një monumenti të përjetshëm prej fjalëve, vargjeve dhe mallit
për mikun e tyre, që tashmë e kujtojnë për veprimtarinë e tij, për bujarinë
dhe zemërgjerësinë prej fisniku. Idenë për një ndërmarrje të këtillë e hodhi
Halil Xani, për ta mbështetur pastaj edhe të tjerët, si Xheladin Mjeku, Agim
Metbala, Xheladin Hamza e deri tek miqtë nga diaspora që kontribuan në
financimin e botimit të këtij libri të veçantë dhe të një rëndësie të
shumëfisht, kur kemi parasysh përfshirjen e materialeve që janë bërë këtu.
Tashmë kjo inisiativë përfundimisht po bëhet realitet, me nxjerrjen në dritë
të këtij libri me shumë shkrime e dëshmi tjera, që në një mënyrë paraqet një
monografi për autorin dhe, poashtu është edhe libër me përkushtime poetike e
dëshmi me fotografi të ndryshme, ku dëshmohet se Adem Berisha ishte i afërt
me miqtë dhe nuk hezitonte të gjendej në gëzime e hidhërime, në aktivitete
kulturore e përurime librash, pavarësisht kohës dhe vendit ku zhvilloheshin
ato.
Adem Berisha, ashtu sikur i bashkonte të gjithë
miqtë në një kuvend mendimesh e idesh me urtinë dhe fjalën e ëmbël për të
gjallë, ashtu i bashkoi këtu në këtë libër, me shkrimet përkujtimore
dedikuar emrit dhe veprës së tij, për të mbetur përgjithmonë Libri i
dashurisë dhe dhimbjes për mikun e tyre që i deshi dhe i respektoi në çdo
kohë, poaq sa edhe miqtë, me konsideratën e tyre të pakursyer shprehën
dhimbjen, mallin dhe krenarinë për mikun e tyre, që tashmë e kujtojnë në
mënyrën më të bukur, duke sjellur evokimet dhe gjithçka kishin për të thënë
e kujtuar për te në këtë përmbledhje shkrimesh e fotografish, si një
bibliotekë dhe galeri nën të njëjtin kulm, të pagëzuar me emrin simbolik
‘Prekja e dhimbjes”, që flet bindshëm për frymën e mesazhin që përshkohet
këtu.
U bashkuan miqtë dhe bënë një monument
përkujtimor për mikun e tyre që aq shumë i deshi dhe e deshën deri në çastet
e fundit të jetës, do të ishte konkludimi më i përafërt i kësaj që u tha dhe
u bë për ndriçimin e emrit dhe veprës së Adem Berishës.
Nga Hartuesit e librit
|
