Sakras Art Gallery

Sekuenca filmike

RTK

TOP CHANNEL

RTV 21

ALSAT

TV KLAN

KLAN KOSOVA

BOTA.AL

ALBANIAPRESS

ALBINFO

EXPRESS

KOHA DITORE

ZËRI INFO

KOSOVA SOT

INSAJDERI

BOTA SOT

GAZETA METRO

GAZETA SINJALI

ALBANIAN POST

KALLXO COM

LAPSI.AL

ZEMRASHQIPTARE

KOSOVA PRESS

TELEGRAFI

EUROPA E LIRË

ZËRI I AMERIKËS

PSIKOLOGJIA

TRIBUNA SHQIPTARE

SHËNDETI

DITURIA

PRESHEVA.COM

GJUHA SHQIPE

KOSOVARJA

RADIOPROJEKT

Shkruan: Sabir KRASNIQI

SHKOLLA E HIPNOZËS  (2) 

       Për vizitorët e nderuar të web faqes www.sa-kra.ch e posaçërisht për ata që janë të interesuar për lëmin e hipnozës, në këtë shkrim, të cilin e kam ndarë në disa pjesë, do ua paraqes bazën e induktimit të gjendjes hipnotike. E kam emërtuar shkolla e hipnozës, pasi materiali i mëposhtëm nuk përbëhet vetëm nga ana teorike, por sqaron hap pas hapi edhe format praktike, të cilat, përmes ushtrimeve të përshkruara, do të ju shpien padyshim deri te suksesi.

            Shikimi magnetik

            Sytë thuhet sa janë pasqyra e jetës, që duhet të jetë e vërtetë. Ata kanë rëndësi të veçantë në jetën e njeriut. Shumica e njerëzve kësaj shqise i japin prioritet ndaj shqisave tjera, sepse në krahasim me shqisat tjera, kjo shqisë komunikon me një pjesë më të madhe të trurit dhe ne i besojmë  më shumë informacionit pamor se çdo  lloji tjetër të informacionit ndijor.

            Kjo shqisë, që nganjëherë krahasohet me një  „videokamerë të gjallë“, ka rëndësinë kryesore (bashkë me „zërin magnetik“) për induktimin e gjendjes hipnotike. Sytë kanë pushtet shumë të fuqishëm dhe janë si gjenerator reflektues, kështu që, ushtrimi i shikimit magnetik  luan rol shumë të  rëndësishëm në ndikimin e një individi mbi tjetrin.

            Në qoftë se gjatë një bisede me një individ, ne e shikojmë atë në sy, si dhe ai neve, ndikimi dhe pranimi i sugjestionit  nga ai, do të jetë shumë më i madh se sa kur  vështrimi i tij reflektohet diku tjetër. Ndikime të tilla nuk vërehen vetëm tek qeniet njerëzore, por në raste të shumta edhe tek bota shtazore e edhe te llojet më të ulëta. P.sh. gjarpri  vetëm me një shikim „magnetik“ e detyron bretkosën t’i afrohet, kurse ai e pret viktimën me kokën lart, dhe kur ajo i afrohet në distancën e caktuar  10-15 cm, me një lëvizje të shpejtë e gëlltit atë. Është interesant të cekët  se aq i madh është koncentrimi i gjarprit, sa që edhe po t’i afrohemi  deri në një metër largësi, ai nuk e vëren praninë tonë, pra nuk reagon. Por edhe gjatë asaj kohe, po të lëvizet bretkosa ose të ndërpritet shikimi i gjarprit, do të ndërpritet edhe  gjendja e bllokadës së krijuar dhe bretkosa do të ndërmarrë veprim mbrojtës.

            Pastaj kemi  edhe shembullin  e hutinit, i cili në mënyrë  të njëjtë  si gjarpri, rri i shtanguar dhe vetëm me shikim i detyron viktimat e veta, në këtë rast zogjtë, që t’i futen në gojë pa kundërshtim... Këto raste  i cekëm vetëm për ta vërtetuar forcën e madhe ndikuese që kanë sytë.

            Sytë paraqesin edhe anën e brendshme emocionale. Vetëm me një shikim ne sy mund ta dimë se në çfarë gjendje shpirtërore është individi, prandaj edhe ushtrimi i shikimit magnetik është  më se i domosdoshëm (jo vetëm për  induktimin e gjendjes hipnotike, por edhe për  paraqitjet në  jetën e përditshme).

            Për ta zhvilluar shikimin magnetik, për të pasur ndikim mbi individët e tjerë, duhet t’u përmbaheni disa rregullave gjatë ushtrimeve sistematike:

   a) Njëherë në ditë duhet t’i pastroni  sytë në këtë mënyrë: Duhet të futet koka  (pjesa e fytyrës) në  një enë të mbushur me ujë  të pastër e të vakët dhe të hapën sytë. Në qoftë se gjatë kësaj kohe, për arsye të ndryshme,  ndieni ngacmime të përcjella me djegieje në sy, nuk duhet të frikësoheni. Kjo ndjenjë  e pakëndshme  pas disa ditësh do t’ju largohet dhe ju  do ta ndjeni ndikimin mirëbërës të këtij veprimi. Për të qenë efekti më i shpejtë, këtë ushtrim mund ta përsëritni dy herë në ditë.

   b) Në këtë ushtrim  duhet t’i ushtroni edhe lëvizjet e kokërdhakëve  të syve që të shikojnë në drejtime të ndryshme. Së pari duhet që shikimin ta drejtoni nga ana e majtë  në të djathtë (ose anasjelltas) aq sa është e mundur 10-12 herë, pastaj shikimin ta drejtoni lart e poshtë (ose anasjelltas), prapë, aq sa është e mundur, 10-12 herë. Ky ushtrim është mirë të bëhet më shpesh, 3-4 herë në ditë.

   c) Gjithashtu, edhe masazhi i syve  ka ndikim të madh. Me gishtat tregues duhet që t’i fërkoni sytë (duke mos i shtypur fort). Së pari kapakët e sipërm të syrit, nga ana e brendshme në drejtim të  anës së jashtme, pastaj në të njëjtën mënyrë  të veproni edhe me kapakët e poshtëm të syve, 8-10 herë. Edhe ky ushtrim preferohet që të bëhet dy herë në ditë. Pas  10 ditësh të këtyre ushtrimeve  mund të kaloni në ushtrimin e shikimit magnetik.

  d) Uluni në një karrige dhe vendosini duart në gjunjë. Shikimin drejtojeni  në një pikë të cilën  e ke vënë (vizatuar) në mur ose diku tjetër, në lartësinë e  syve tuaj dhe në largësi  1-1,5 m.  Fiksim duhet të zgjasë 5 min. dhe gjatë kësaj kohe nuk duhet që t’i mbyllini kapakët e syve, e as të bëni  ndonjë lëvizje tjetër  të muskujve të  fytyrës. Ky ushtrim ndoshta në fillim do të duket  i vështirë, sidomos për ata që i kanë sytë e dobët, por pas  ca ditësh  do ta përvetësoni.

   e) Uluni para pasqyrës  dhe  përqendrojeni shikimin  në mes të syve tuaj, në figurën e reflektuar në pasqyrë. Për fillim do të ishte mirë që atë pjesë  ta markoni  me ndonjë simbol ose ngjyrë. Edhe këtu si në ushtrimin a), duhet që të shikoni pa i mbyllur kapakët e syve dhe pa bërë lëvizje të muskujve të fytyrës. Në fillim ky ushtrim duhet të zgjasë nga 5 minuta, më pas, për çdo ditë mund t’i shtohet nga një minutë, derisa të arrihet koha prej 10 minutash. Brenda këtyre 10 ditëve duhet  që ta koncentroni vëmendjen tuaj vetëm  në mënyrën e frymëmarrjes që ajo të jetë e thellë dhe me ritëm. Ndërsa pas 10 ditësh, koncentrimin mund ta orientoni  në një dëshirë të caktuar, p. sh.: „Unë dëshiroj të bëjë këtë e këtë...“. Pasi të arrini që shikimin ta mbani 10 minuta, mund të kaloni në ushtrimin tjetër.

   f) Zgjedhni disa fotografi të ndryshme, mundësisht me ngjyra, nëpër revista  dhe vendosini  para vetës në tavolinë në largësi 30-50 cm. Fiksojeni vështrimin në njërën nga ato, në mes të syve të individit  që ndodhet aty (në fotografi). Do të ishte mirë ta zgjidhni fotografinë e ndonjë individi që ka shikim të thellë e të mprehtë. Së pari duhet që të ushtroheni, që ta shikoni atë individ në sy për 10 minuta, e pastaj për çdo ditë deri sa ta arrini kohën e dëshiruar (do të ishte mirë mbi 20 min.). Gjatë kësaj kohe, derisa e shikoni  individin e zgjedhur, duhet  ta urdhëroni (me  mendime të koncentruara) që t’i kryej  veprimet e dëshiruara prej jush.

          Ky ushtrim është edhe testim i aftësive të fituara gjatë ushtrimeve të mëparshme dhe njëkohësisht  aplikimi i kësaj force në praktikë. Dilni në rrugë dhe fiksojeni një individ që po vie në drejtimin tuaj. Ecni edhe ju në drejtim të tij dhe, kur të afroheni në distancën e caktuar 10-20 metra, shikojeni direkt në mes të syve me shikim magnetik dhe koncentrohuni me mendime se në cilën anë të rrugës, djathtë apo majtë, t’ju largohet. Ta keni parasysh, se gjatë koncentrimit duhet ta përfytyroni sa më qartë në mendime ngjarjen që duhet të ndodh, pra ta shihni ngjarjen përpara me „syrin shpirtëror“, të kryer ashtu siç dëshironi. Pasi ta keni kaluar këtë ushtrim me sukses në disa persona atëherë provojeni edhe një tjetër. Dilni në rrugë  dhe përcilleni një individ nga prapa, në distancë 2-4 metra. Drejtojeni shikimin magnetik në pjesën e prapme të kokës dhe koncentrohuni duke e urdhëruar: “Ti duhet ta kthesh kokën  në anën e majtë (ose të djathtë)... “. Por veprimi duhet të jetë si në rastin e parë, i vizualizuar në „ekranin  shpirtëror“ si i kryer. Këtë urdhër përsëriteni disa herë, derisa  individi ta bëjë atë veprim që e keni urdhëruar ju. Kur ta arrini këtë atëherë ju keni arritur që të keni ndikim mbi individin tjetër vetëm me forcën e shikimit dhe mendimit të koncentruar. Në qoftë se në rastet e para nuk korrni sukses, nuk duhet assesi të dëshpëroheni por duhet të vazhdoni me persona tjerë, deri sa t’ia arrini, sepse  suksesi varet shumë edhe nga  gjendja përkatëse shpirtërore e  personit  në të cilin mundoheni të ndikoni. Mos harroni, se këtë forcë mund ta orientoni  edhe për qëllime negative që hyjnë në rangun e magjisë së zezë, por ju këshilloj që çdo tentativë e ndërmarrë në atë drejtim, do t’ju kthehet si bumerang i shumëfishtë, sepse vetë dialektika e ligjeve të natyrës  funksionon në atë  sistem.  

            Zëri magnetik

            Zëri është i rëndësishëm për induktimin e gjendjes hipnotike, aq sa edhe shikimi. Ndryshimet  e shpejta, të shkaktuara  nga ndonjë objekt vibrues, quhen: valë zanore. Këto valë zanore  që depërtojnë  nëpërmjet ajrit, përngjajnë  në  valëzimet e ujit të shkaktuara nga  hedhja e ndonjë guraleci. Por edhe  këto valë  zanore  ndryshojnë, varësisht prej frekuencës, amplitudës dhe timbrit, që d.m.th., tingujt e lëshuar nga  goja  duhet të kenë volum të caktuar (që matet me decibel). P.sh. frymëmarrja  normale varion rreth 10 decibel, biseda normale rreth 60 decibel, autobusi rreth 90 decibel, bubullima rreth 120 decibel, e kështu me radhë. Mbi 130 decibel fillon pragu i dhembjes, p.sh. motori i aeroplanit që  varion rreth 150 decibel ose raketa kozmike rreth 180 decibel  etj.

            Pra, gjatë bisedave, si gjatë induktimit të gjendjes hipnotike, si në jetën e përditshme, duhet të ushtrohemi  që ta përdorim tingullin me volumin e caktuar, varësisht prej  rastit të imponuar, gjë që na prezanton para të tjerëve si një personalitet të vendosur, tërheqës etj. dhe automatikisht krijojmë  përshtypjen  e simpatisë tek ata, e njëkohësisht edhe pushtetin mbi ta.

            Gjatë jetës së përditshme, edhe ju lexues të nderuar, keni raste takimesh me individë  të ndryshëm. Sigurisht se keni vërejtur se secili nga ata kur flet ka zërin e tij karakteristik, gjë që paraqet volumin e caktuar të zërit për personin e caktuar. Kështu që, një individ nëpërmjet modulimit të zërit të vet, ose na tërheq ose na refuzon, pavarësisht nga kuptimi i fjalive që i shqipton.

            Këto ishin disa karakteristika  mbi  rëndësinë e zërit. Ju zërin  momentalisht e keni ashtu siç e keni, por për ta bërë zërin  ashtu siç dëshironi, pra magnetik,  duhet t’i vazhdoni ushtrimet  që do t’ju  paraqesim më poshtë. Është shumë e rëndësishme që këto ushtrime  të zhvillohen në  mënyrë të koncentruar. Çdo fjalë që do ta përdorni duhet të jetë  e qartë  dhe e kuptueshme. Gjithashtu, është me rëndësi  edhe  shqiptimi i zanoreve; ato duhet të shqiptohen pa kurrfarë shtese  e as nuance.

   a) Së pari duhet të filloni me leximin e ndonjë libri ose artikulli gazetaresk. Fjalët më të gjata, ndani në rrokje; përsëriteni secilën rrokje veç e veç, pastaj gjithë fjalën në tërësi p.sh.: hipnozë - hi-pno-zë. Fillo me rrokjen e parë „hi“, duke e përsëritur disa herë „hi“,“hi“,“hi“..., pastaj tjerat me radhë, e pastaj gjithë fjalën - hipnozë. Kur ta përvetësoni këtë aftësi, kaloni në ushtrimin tjetër.

   b) Ky ushtrim rekomandohet të bëhet në ndonjë vend, mundësisht sa më të qetë. Mund ta zhvilloni si në ambient të mbyllur (dhomë) ashtu edhe në natyrë. Duhet të uleni në një vend ku do ta ndieni vetën këndshëm, dhe përballë jush duhet ta paramendoni një individ tjetër. Së pari përfytyroni  një individ, në të cilin besoni se keni ndikim, e me kohë  (pas disa ditësh), filloni t‘i përfytyroni individët për të cilët mendoni ai se ndikojnë mbi ju. Këtë ushtrim duhet ta zhvilloni për çdo ditë  nga 15-20 minuta. Shikoni me shikim magnetik në individin e përfytyruar dhe filloni t’i flisni atij me zë magnetik. Bisedën mund ta përgatitini edhe më herët; temat mund të jenë të ndryshme, me rëndësi është që zëri juaj duhet të ketë efekt ndikues mbi të përfytyruarin. Gjatë bisedës (së përfytyruar) nuk është e preferuar të gjestikuloni. I gjithë trupi juaj duhet të jetë në gjendje stabile, si dhe koncentrimi duhet të jetë maksimal. Pasi të besoni se keni arritur efekt ndikues edhe tek personat  që më parë kanë pasur ndikim mbi ju, atëherë filloni me pyetje provokuese, të cilave ai do t’ju kundërvihet (gjithnjë në përfytyrim), e ju, gjatë gjithë këtyre provokimeve, nuk duhet të reagoni. Duhet të jeni i qetë dhe gjakftohtë. Këtë ushtrim që e cekëm  më lartë si dhe ushtrimet e mëparshme, e edhe ato që do të pasojnë, duhet të merren në mënyrë shumë serioze, edhe pse në dukje të parë  duken si fantazi, iluzione, lojë fëmijësh etj., sepse në fakt, ndikimi i tyre  ka efekt të madh. Ata që i njohin ligjet e psikes, ligjet e mendjes (shpirtit) e dinë këtë. Për informim dhe njohuri më të thella  ju rekomandoj disa libra si: „Forca e ndërdijes“ nga autorit Xh.Marfi, „Sistemi im i suksesi“ nga O. Shelbah, „Sugjestioni dhe autosugjestioni“ nga E. Caue etj.

   c) Pasi të besoni se jeni i sigurt në bisedat tuaja me individin e përfytyruar, atëherë kaloni në ushtrimin direkt me individë realë. Ky ushtrim është i njëjtë  me të mësipërmin (b), por ndryshimi qëndron në atë se tani kemi kontakt fizik dhe psikik me individë realë. Edhe këtu preferohet, si më sipër, që së pari të filloni me ndonjë individ  mbi të cilin besoni se keni ndikim, e pastaj me  të tjerë që kanë ndikim mbi ju. Mos harroni: gjatë bisedës shikimi  duhet të jetë gjithnjë magnetik. Do të habiteni edhe ju vetë (në qoftë se i keni përvetësuar ushtrimet e cekura) se çfarë ndikimi do të kenë fjalët tuaja dhe sa i pushtetshëm do të jeni mbi të tjerët.

            Pasi t’i keni  kryer këto veprime me sukses, atëherë ju i keni përvetësuar  aftësitë e ndikimit mbi të tjerët, që janë  shumë të rëndësishme për hapat e mëtejmë, për të cilën gjë do të bindeni edhe vetë.

            Veprimi në praktikë

            Pasi  të jeni aftësuar me ushtrimet, të cilat i kemi sqaruar në pjesën e mëparshme, mund të kaloni në aplikimin e gjumit  hipnotik në praktikë. Procesi i hipnotizimit zhvillohet në shumë mënyra dhe kalon nëpër disa faza. Pavarësisht se ku realizohet  hipnoza, qoftë në ordinancë, shoqëri apo vend publik etj., themelorja është që të zgjojmë interesim tek të pranishmit, e sidomos te mediumi, si dhe të krijohet atmosferë disponuese duke biseduar për anët  pozitive dhe  efektet e këndshme të hipnozës. Dhoma duhet të jetë e ngrohtë, pa zhurmë, pa ndonjë erë të keqe, pak e errësuar dhe preferohet të ketë muzikë të lehtë relaksuese.

            Natyrisht, që këto kushte nuk mund t’i plotësojmë në çdo rast, këto zakonisht vlejnë për aplikimin e hipnozës klasike dhe në vende të mbyllura. Por, ekzistojnë  edhe shumë lloje teknikash të tjera  të cilat mundësojnë  vënien në gjumë hipnotik të secilit individ, pavarësisht nga  rrethanat që mbizotërojnë, qofshin ato subjektive apo objektive, për të cilat do të bëjmë fjalë më vonë.

            Si gjendet mediumi i përshtatshëm

            Për  eksperimentet e para hipnotike preferohet që të zgjedhet mediumi i cili  më parë ka qenë nën ndikimin e hipnozës, pasi personi i hipnotizuar më parë i nënshtrohet më lehtë hipnozës, që do ta lehtësojë punën dhe do t’ua shtojë sigurinë për veprime të mëtejme. Gjithashtu, për fillim preferohen edhe adoleshentet (12-16 vjeç), pasi ata i nënshtrohen  më lehtë gjendjes hipnotike. Edhe gjinia femërore i nënshtrohet më lehtë pushtetit  hipnotik, prandaj për fillim mund ta aplikoni edhe në femra. Zakonisht preferohet që mediumi të mos i takojë familjes së ngushtë, pasi anëtarët e familjes, duke qenë në kontakte të përditshme me ju, nuk ju besojnë dhe këtë çështje nuk e marrin seriozisht, kështu që eksperimenti mund t’ju dështojë, që do të shkojë në dëm të sigurisë suaj për hapa të mëtejmë.

            Edhe personat që janë mësuar me urdhra (shërbëtorët) i nënshtrohen lehtë hipnozës. Gjithashtu medium të mirë janë personat sugjestibilë (të ndejshëm); pastaj personat që posedojnë  fantazi të bujshme; personat me flokë  ngjyrë  të kuqe ose biond; personat me ten delikat etj. Pasi ta keni bërë studimin e karakteristikave të caktuara të mediumit, filloni dialogun me të. Siç e kemi cekur edhe më lartë, duhet të krijohet atmosferë sa më e këndshme për mediumin. Për ta ditur mendimin e mediumit mbi hipnozën, duhet që t’i parashtroni pyetje që kanë të bëjnë me këtë temë. Në rast se mediumi ka bindje pozitive për këtë dukuri, atëherë induktimi i gjendjes hipnotike do jetë më i lehtë, por nëse ai posedon bindje negative, që janë raste më të shpeshta (pasi hipnoza  si lëmi është shumë pak e njohur në mesin tonë dhe shpesh krahasohet me nocionin magji, e nocioni magji tek njeriu i rëndomtë merret si sinonim i së keqes, që në fakt nuk është e vërtetë. Sqarime më të hollësishme rreth magjisë kam dhënë në librin „Parapsikologjia...“ por informacione të bollshme keni edhe tek sektori i kësaj web faqeje me të njëjtin titull “Parapsikologjia”), atëherë duhet që nëpërmjet  dialogut, nga logjika e tij të largohen (eliminohen)  të gjitha ato mendime e bindje  të gabuara negative, të cilat ai i ka  pranuar e kultivuar më herët  në lidhje me hipnozën.

            Mediumi duhet të bindet se ju ia dëshironi të mirën në mënyrë më të sinqertë. Pra ju, gjithçka që bëni, e bëni për të. Për të krijuar siguri tek ai, ju duhet që t’i sqaroni, se ai çdo mbrëmje kur bjerë për të fjetur ose në mëngjes para se të zgjohet, kalon një kohë të shkurtër  nëpër disa nga fazat e gjendjes hipnotike, por pa vetëdije. Gjithashtu edhe ditën, kur është i koncentruar diku p.sh., kur është duke shikuar nga dritarja, kur është duke vozitur automjetin, kur është duke medituar etj., ai në ato çaste gjendet në pushtetin e një gjendjeje të lehtë hipnotike. Pra, mediumi gjithsesi duhet të bindet për efektet pozitive  që ka hipnoza, duke mënjanuar çdo premisë droje a frike për të.

            Vazhdon....