Sakras Art Gallery

Sekuenca filmike

RTK

TOP CHANNEL

RTV 21

ALSAT

TV KLAN

KLAN KOSOVA

BOTA.AL

ALBANIAPRESS

ALBINFO

EXPRESS

KOHA DITORE

ZËRI INFO

KOSOVA SOT

INSAJDERI

BOTA SOT

GAZETA METRO

GAZETA SINJALI

ALBANIAN POST

KALLXO COM

LAPSI.AL

ZEMRASHQIPTARE

KOSOVA PRESS

TELEGRAFI

EUROPA E LIRË

ZËRI I AMERIKËS

PSIKOLOGJIA

TRIBUNA SHQIPTARE

SHËNDETI

DITURIA

PRESHEVA.COM

GJUHA SHQIPE

KOSOVARJA

RADIOPROJEKT

Shkruan: Sabir KRASNIQI

SHKOLLA E HIPNOZËS  (3) 

       Për vizitorët e nderuar të web faqes www.sa-kra.ch e posaçërisht për ata që janë të interesuar për lëmin e hipnozës, në këtë shkrim, të cilin e kam ndarë në disa pjesë, do ua paraqes bazën e induktimit të gjendjes hipnotike. E kam emërtuar shkolla e hipnozës, pasi materiali i mëposhtëm nuk përbëhet vetëm nga ana teorike, por sqaron hap pas hapi edhe format praktike, të cilat, përmes ushtrimeve të përshkruara, do të ju shpien padyshim deri te suksesi.

            Testet e Sugjestibilitetit

            Pasi të keni krijuar raporte pozitive me mediumin, filloni me testet e sugjestibilitetit, për ta testuar sugjestibilitetin e tij. Ato janë të shumta, por unë po ua paraqes, si gjithnjë, më të rëndësishmet.

       a) Testi i baraspeshës I: Mediumin e urdhëroni që të qëndrojë në këmbë drejt, me këmbët e bashkuara dhe duart e mbështetura për trup, kurse sytë t’i mbyllë. Ju qëndroni prapa tij me shuplakat e duarve të mbështetura  lehtë mbi shpatullat e tij. Duke e vështruar me shikim magnetik, ju i sugjeroni me zë magnetik se do të numëroni deri në  10 (nuk është e thënë  të numërohet patjetër deri në 10, mund të numërohet  edhe deri në 5 ose dhe deri në 3, me rëndësi është efekti) dhe gjatë thënies së secilit numër, ai do të ndiejë një  forcë të fuqishme e cila do ta shtyjë prapa. Gjithashtu i sugjerohet  që atë forcë mos ta kundërshtojë, por të lirohet nën pushtetin e saj, pa pasur frikë se do të  rrëzohet, pasi ju që rrini prapa do ta mbani. Pastaj filloni të numëroni:”

1        - Ju po e ndieni një forcë që po ju shtyn prapa.

2        - Ajo po bëhet gjithnjë e më e fuqishme.

3        - Gjithnjë e më e fuqishme.

4        - Ju nuk po mund ta përballoni atë.

5        - Ju po bini gjithnjë e më shumë nën pushtetin e saj.

6        - Ju po bini gjithnjë e më shumë, gjithnjë e më shumë.

7        - Ju nuk po mund ta përballoni atë.

8        - Ju po bini, po bini.

9        - Gjithnjë e më shumë po bini prapa.

10    - Ju ratë, por unë po ju mbaj, mund t’i hapni sytë etj.”

            Ndodh shpesh që  mediumi të bjerë  ende pa arritur numrin 10. Këtu qëndron edhe një fshehtësi: gjatë  numërimit, shuplakat tuaja të mbështetura  për shpatullat e mediumit, duhet t’i tërhiqni lehtë prapa, kështu që mediumi, pasi i ka sytë e mbyllur, i nënshtrohet provokimit mashtrues dhe lëviz bashkë me shuplakat tuaja prapa, duke u bërë pa vetëdije pre e lojës, sakaq efekti i testit do të ketë sukses.

          b) Testi i baraspeshës II: Mediumin e urdhëroni të qëndrojë si në testin e mësipërm, por sytë duhet t’i ketë të hapur. Ju qëndroni para tij, ndërsa prapa tij e urdhëroni të qëndrojë personi i tretë  i cili do ta mbajë në rast se rrëzohet (është  rregull dhe obligim i detyruar, që gjatë  induktimit të gjendjes hipnotike, për shkaqe keqpërdorimi, të jetë prezent edhe  personi i tretë, për ç‘gjë do të bëjmë fjalë në pjesën-keqpërdorimi i hipnozës). Gishtin tregues ia afroni 5-10 cm. para syve duke e urdhëruar që shikimin ta drejtojë në maje të tij. Pastaj e vështroni me shikim magnetik dhe filloni t’i sugjeroni me zë magnetik, se do të numëroni deri në ...10 dhe, gjatë secilit numër, ai do të ndiejë një forcë të fuqishme se si po e shtyn prapa; i sugjerohet që mos ta kundërshtojë atë forcë, por të lirohet nën pushtetin e saj. Pastaj filloni të numëroni si në testin e mësipërm:”

1        - Ju  po e ndieni një forcë që po ju shtyn prapa.

2        - Ju po bini gjithnjë e më shumë  në pushtetin e saj

3        ... e kështu me radhë.”

            Edhe në këtë test qëndron një fshehtësi, një lloj truku: Ju duhet që gishtin tregues ta afroni ngadalë drejt syve të mediumit, që tek ai do të provokojë ndjenjën mashtruese  të frikës, dhe në mbrojtje, instinktivisht e pavetëdije, ai do të tërhiqet prapa.

            Te dy këto teste, zakonisht përfundojnë me sukses. (Për të mos e përmendur  rregullisht  fjalën-magnetik, duhet ta keni parasysh se të gjitha  veprimet, si shikimin, dialogun, lëvizjet etj. duhet t’i bëni nën atë forcë, me të cilën jeni pajisur më parë, pra  nën forcën magnetike).

       c) Testi i shtrëngimit të duarve:  Mediumin e urdhëroni që t’i  lidh gishtat e te dy duarve mes veti dhe t’i shtrëngojë. Pastaj ju ia vendosni duart tuaja mbi të tijat, duke i sugjeruar se kur të numëroni deri në ...10, ai nuk do të mund t’i zgjidh ato. Gjatë thënies së secilit numër i sugjeroni se duart e tij gjithnjë e më shumë po shtrëngohen. Filloni të  numëroni:”

1-      Duart tuaja po ju shtrëngohen.

2-     Gjithnjë e më shumë, gjithnjë e më shumë.

3-     Ato po bëhen gjithnjë e më të rënda.

4-     Po bëhen shumë shumë të rënda.

5-     Gjatë secilit numër ato gjithnjë e më shumë po ju shtrëngohen.

6-     Ato janë salduar mes veti.

7-     Edhe po të provoni t’i zgjidhni nuk do të mundeni; ato gjithnjë e më shumë  do t’ju shtrëngohen.

8-     Gjithnjë e më shumë po vijnë duke ju shtrënguar .

9-     Ato janë shtrënguar plotësisht.

10- Ju nuk mund t’i zgjidhni, provojeni.”

          Në qoftë se mediumi nuk mund t’i zgjidh duart, atëherë testi është zhvilluar me sukses dhe induktimi i gjendjes hipnotike  tek ai  është  70-80% i sigurt.                                                             

          Pas mbarimit të testit me sukses, sugjestionin duhet ta ndërpresim kujdesshëm. Kjo bëhet  duke numëruar deri në tre në këtë mënyrë: „Kur të numëroj deri në tre, duart tuaja do të zgjidhen, ato do të jenë plotësisht të lira.

1-         Duart tuaja po ju lirohen, po i ndieni shumë  të lehta.

2-         Gjithnjë e më shumë po ju lirohen, gjithnjë e më të lehta po i ndieni.

3-         Ato janë plotësisht të lira dhe të lehta, mund t’i zgjidhni ngadalë.“

            d) Testi i bllokimit të kapakëve të syve: Mediumi urdhërohet që t’i mbyll sytë, pastaj me gishtin tregues dhe të mesëm të dorës së djathtë ia shtypni lehtë kapakët e sipërm të syve, duke i sugjeruar se kur të numëroni deri ne ...10, ju nuk do të mund t’i hapni sytë. Filloni numërimin:”

1-         Jeni shumë i lodhur dhe kapakët e syve po ju rëndohen.

2-         Kapakët e syve i keni shumë të rëndë.

3-         Ata po ju bëhen gjithnjë e më të rëndë.

4-         Gjatë secilit numër ata gjithnjë e më shumë po ju rëndohen.

5-         Ju tani nuk mund as t’i hapni, por ju as që dëshironi një gjë të tillë.

6-         Po bëhen gjithnjë e më të rëndë; plumb të rëndë.

7-         Ju nuk mund t’i hapni edhe po të dëshironi.

8-         Ata u janë mbyllur fortë.

9-         Ata u janë salduar.

10-     Ju nuk mund t’i hapni; provojeni por nuk do të mundni.”

            Në  qoftë se pas sugjestionit të fundit, mediumi nuk mund t’i hapë sytë, testi ka pasur sukses  dhe induktimi i gjendjes hipnotike është 100% i sigurt.

            Ndërprerja e sugjestionit bëhet si më poshtë: “Kur të numëroj deri në tre  ju do të mund t’i hapni sytë.

1-         Kapakët e syve tuaj po ju lehtësohen, po ju bëhen shumë  të lehtë.

2-         Ata janë  tani shumë të lehtë.

3-         Ju mund  t’i hapni sytë, hapini ngadalë.”

            Procedurën e testit të tretë dhe të katërt, në rast mungese të suksesit, duhet ta përsëritni  deri në tri herë. Në qoftë se edhe pas herës së tretë nuk keni sukses, atëherë filloni drejtpërdrejtë me teknikat e hipnozës.

            Nuk është e thënë që të  zbatohen të gjitha testet e lartpërmendura gjatë aplikimit të gjendjes hipnotike, në të shumtën e rasteve  mjafton vetëm njëri nga ata. Por, zakonisht, këto mënyra të testimit përdorën  nga fillestarët pasi, me kohë, kur të profesionalizoheni, do ta vëreni edhe vetë se nuk do t’ju nevojiten.

            Induktimi i gjendjes hipnotike

            Pas përgatitjes verbale  të mediumit dhe pas aplikimit me sukses të  njërit nga testet e sugjestibilitetit, filloni me induktimin e gjendjes hipnotike.

            Mediumit i sugjerohet që të ulet në një vend  të përshtatshëm dhe lihet 10-15 minuta që të relaksohet. Pastaj uluni edhe ju para tij  në një distancë rreth 1 metër  dhe filloni ta fiksoni atë duke e shikuar drejt në sy. Urdhërone edhe mediumin, që edhe ai t’ju shikojë juve drejt në sy. Gjatë këtij shkëmbimi shikimesh nuk duhet që ta luani as qerpikun. Fiksojeni kështu mediumin rreth 30 sekonda, pastaj sugjeroni: „Ju po e ndieni vetën të lodhur; kapakët e syve po ju rëndohen.  Ju po ndieni nevoj për gjumë“.

            Pasi t’i përsëritin këto fjali, në një interval prej 5-6 sekondash në mes, bëni një pauzë 10-15 sekondash. Ky rregull vlen për të gjitha  sugjestionet pasuese. Prapë, pas 10-15 sekondash, vazhdoni fjalitë me zë të qetë e monoton, por të qartë: „Kapakët e  syve po ju bëhen të rëndë, gjithnjë e më të rëndë; ju mezi i mbani ata të hapur; gjumi, gjithnjë e më shumë po ju rëndon“. Në qoftë se vëreni   se mediumit po i dridhen kapakët e syve, atëherë jepjani sugjestionin: „Mbyllni sytë - flini!“

            Pas një pauze 10-15 sek., vazhdoni: „Ju po e dëgjoni çdo fjalë timen dhe po e kuptoni shumë mirë. Asgjë nuk po  ju pengon; po e ndieni vetën shumë mirë. Ju do të flini aq gjatë derisa  unë të mos ju zgjojë“.

            Pas 10-15 sek., vazhdoni prapë: „Ju po ndjeheni shumë mirë. Sytë gjithnjë  e më shumë po ju rëndohen; po ju bëhen si plumb të rëndë; aq të rëndë  sa që ju nuk po mund t’i hapni, por ju as që e dëshironi një gjë të tillë „ ...10-15 sek. „Gjumi  juaj po bëhet gjithnjë e më i thellë e më i fortë, por zërin tim po e dëgjoni dhe çdo fjalë timen po e kuptoni qartë. Vetëm zërin tim po e dëgjoni dhe  asgjë tjetër nuk po ju intereson; vetëm zëri im. Nën tingujt e zërit tim ju po ndjeheni këndshëm, shumë këndshëm“. ...10-15 sek. „Ju po flini plotësisht i qetë. Sistemin nervor e keni të qetë; zemra po ju  rrah plotësisht normal; i gjithë organizmi është në harmoni të plotë. Ju po kënaqeni në këtë gjumë të thellë. Ju po flini theeellë, theeellë, por zërin tim po  e dëgjoni; vetëm zërin tim dhe asgjë tjetër. Jeni shumë i qetë; çdo gjë është me ju në rregull“.

            Pas një  pauze të shkurtër, me zë magnetik drejtojuni mediumit: „Kur të numëroj deri në tre ju do të jeni në gjumë të thellë hipnotik. 1...2...3 ju jeni në  gjendje hipnotike; ju jeni në gjendje të thellë hipnotike“.

            Gjatë gjithë kohës, derisa mediumi gjendet në procesin e gjendjes  hipnotike, duhet t’ia përsëritni sa më shpesh sugjestionin:“ Ju po e ndieni vetën në çdo aspekt plotësisht mirë“.

            Për ta verifikuar thellësinë e gjumit hipnotik, sugjeroni mediumit pas një pauze të  shkurtër: „Dora  juaj  e djathtë po ju rëndohet, gjithnjë e më shumë po ju rëndohet. Ju po e ndieni se si  nëpër të  po qarkullon  një energji  e nxehtë. Dora juaj është bërë plumb e rëndë; ju as që  mund ta luani; edhe po të doni nuk mund ta luani; provojeni“.

            Nëse mediumi nuk mund ta lëvizë dorën, atëherë ai gjendet nën pushtetin e gjendjes hipnotike, pra induktimi është bërë me sukses.

            Zhbllokimi i dorës bëhet nën urdhrin e këtyre  sugjestioneve: “Dora juaj po ju lirohet; gjithnjë e më shumë po ju lirohet; po e ndieni dorën shumë të lehtë, gjithnjë  e më të  lehtë; kur të numëroj deri në tre,  dora juaj do të jetë plotësisht në gjendje normale. 1...2...3 ..., tani e keni dorën  në gjendje normale. Provoni ta lëvizni; ju mund ta lëvizni lirisht“. Do të vëreni se si mediumi do ta lëvizë dorën.

            Sugjestionet  e dhëna gjatë gjendjes hipnotike janë shumë të rëndësishme. Një sugjestion i gabuar  mund të ketë pasoja të rënda  për shëndetin e mediumit. Prandaj, duhet të keni shumë kujdes gjatë përpilimit të tyre. Gjithashtu rëndësi të posaçme  duhet t’u kushtohet edhe  urdhëresave të prera dhe ndalesave. P.sh., kurrsesi nuk  guxoni  ta urdhëroni: „Koka nuk po ju  dhemb“ por „kokën e keni  të lehtë dhe të kthjelltë“, ose „duhet të keni sukses“, por „do të keni sukses“, e të tjera të ngjashme.

            Kjo gjendje, kur mediumit arrihet t’i bllokohet një pjesë e trupit, paraqet shkallën e tretë të thellësisë së gjendjes hipnotike, pra fazën më të thellë të saj (për  shkallët e thellësisë së gjumit hipnotik do të bëjmë fjalë në pjesën vijuese - teknikat e ndryshme hipnotike). Në këtë gjendje, mund të provokohet edhe  katalepsia e plotë e trupit, por për fillestarë kjo nuk është e preferuar as e lejuar.

            Pasi të keni arritur që mediumin ta futni në gjumë hipnotik, duhet ta  hapni dialogun komunikues mes jush, pasi që mediumi, pa marrë komandë nga ju, nuk flet. Çdo  kërkesë që e kërkoni nga  mediumi, pavarësisht se e çfarë karakteri është, duhet që së pari  atij t’ia lejoni atë me sugjestion të caktuar. Pasojnë këto sugjestione: „Ju jeni në gjendje të thellë hipnotike por zërin tim po e dëgjoni. Kur të numëroj deri në tre, edhe ju do të mund të bisedoni me mua, por gjithnjë duke qenë në gjendje të thellë hipnotike. Asgjë nuk do t’ju pengojë për dialog. ..1...2...3... edhe ju mund të bisedoni dhe të më përgjigjeni në çdo pyetje. A po më dëgjoni ?“ Përgjigja  zakonisht është:  „Po!“  Në qoftë  se nuk jep përgjigje, përsëriteni sugjestionin.

            Pastaj vazhdoni me sugjestione për hapjen e syve: „Ju po e ndieni vetën shumë mirë; çdo gjë me ju është në rregull. Ju po mund të komunikoni me mua pa problem. Kështu si po komunikoni, kështu edhe do të mund të shikoni, duke i hapur sytë, por gjithnjë duke qenë në gjendje të thellë hipnotike. Kur të numëroj deri në tre, ju do t’i hapni sytë shumë  lehtë, do të shihni sikur në gjendje të zgjuar. ...1...2...3... ju mund t’i hapni sytë. Hapini sytë! A po më shihni mua?“  dhe mediumi do t’ju përgjigjet zakonisht me „Po!“.

            Pasi ta kaloni edhe këtë provë me sukses, pra  mediumi mund të flasë dhe të shohë, atëherë kaloni në fazën e fundit të procesit të hipnotizimit. Kjo fazë ka të bëjë me lëvizjet e lira të mediumit, por gjithnjë duke qenë në gjendje hipnotike. Pasojnë sugjestionet: „Ju  po e ndieni vetën shumë mirë, çdo gjë me ju është në rregull. Pasi që po mund të dëgjoni, bisedoni dhe shikoni, kur të numëroj deri në tre,  ju do të mundeni edhe të lëvizni, të ecni, por,  gjithnjë duke qenë në gjendje të thellë hipnotike. ...1...2...3..., ju mund të lëvizni lirisht, si në gjendje të zgjuar; provojeni dhe ngrehuni nga ulësja“.

            Gjatë kësaj kohe ju duhet që mediumin ta mbani për krahësh deri sa ai të marrë baraspeshën, pasiqë në atë gjendje levizjet janë më të kufizuara.

            Kjo ishte një ndër metodat e induktimit të gjendjes hipnotike, krahas së cilës kemi edhe  qindra të tjera, ku më të rëndësishmet do t’i cekim në pjesën  vijuese.

            Pasi të kryhet procesi i dëshiruar  dhe t‘i jepen sugjestionet e caktuara (të cilat duhen t’i regjistrohen në ndërdije), mediumi duhet të nxirret nga gjendja hipnotike. Por, para se ta nxjerrim mediumin nga gjendja hipnotike, duhet së pari të rikontrollojmë se mos na ka mbetur ndonjë sugjestion negativ  i regjistruar. Për një gjë të tillë duhet të kemi shumë kujdes, pasi sugjestioni i pa zhbllokuar vepron edhe pas gjendjes  hipnotike si sugjestion posthipnotik dhe mund të ketë pasoja të padëshiruara për shëndetin.

            Nxjerrja e mediumit nga gjendja hipnotike  bëhet kështu: i sugjeroni mediumit se kur të numëroni deri në tre, ai do të dalë nga gjendja hipnotike. Do të jetë çdo gjë në rregull, do të jetë i qetë, do të ndihet shumë mirë dhe do të jetë shumë i disponuar e plot energji. Filloni të numëroni ngadalë:

            „1-  Ju po filloni të dilni nga gjendja hipnotike dhe po e ndieni vetën shumë mirë.

            2-  Sa më shumë që po dilni nga gjendja hipnotike  aq më i disponuar po ndjeheni dhe plot energji.

            3-  Ju tani jeni në gjendje të zgjuar, gjithçka me ju është në rregull; ju jeni tani në gjendje plotësisht normale. Zgjohuni!“.

            Gjithashtu, është e nevojshme  që para nxjerrjes nga gjendja hipnotike, mediumit t’i jepet  një shifër çfarëdo p.sh.: A-1 ose B-2 etj. Kjo do të na lehtësojë punë në raste tjera induktimi të kësaj gjendje tek mediumi i njëjtë.

            Procesi zhvillohet kështu: „Para se t’ju nxjerr nga gjendja hipnotike, po ua regjistroj shifrën personale. Këtë shifër do ta regjistrojë ndërdija juaj, derisa vetëdija nuk do të dijë asgjë për të. Me këtë shifër do të mund t’ju hipnotizoj vetëm zëri im dhe asnjë zë tjetër. Shifra juaj është (p.sh.) A-1.  Regjistrojeni në ndërdije. Sa herë ta dëgjoni këtë shifër të përsëritur tri herë A-1,A-1,A-1 nga zëri im, ju  automatikisht do të bini në gjendje hipnotike. A e regjistruat këtë shifër?“  Në qoftë se mediumi përgjigjet me „Po!“, atëherë shifra është regjistruar me sukses, përndryshe ajo duhet të përsëritet.

            Është me rëndësi të ceket fjalia „vetëm zëri im“ sepse, pa këtë urdhër, mediumin mund ta hipnotizojë çdokush që e përmend tri herë atë shifër dhe ai mund të bëhet vegël e verbër pa dëshirën e tij...

            Besoj se në këtë pjesë e bëra një sqarim të dëshiruar për induktimin e hipnozës së parë, sidomos për fillestarë. Edhe në qoftë se për herë të parë nuk do të keni sukses, ju nuk duhet të zhgënjeheni, provojeni prapë edhe një, dy e tri herë, derisa të arrini sukses. Të kujtojmë shembullin e Edisonit i cili, pas 3000 eksperimenteve të pasuksesshme, më në fund, duke menduar pozitivisht „megjithatë do t’ia  dal“,  arriti ta konstruktojë poçin elektrik.

            Vazhdon...