Sakras Art Gallery

Sekuenca filmike

RTK

TOP CHANNEL

RTV 21

ALSAT

TV KLAN

KLAN KOSOVA

BOTA.AL

ALBANIAPRESS

ALBINFO

EXPRESS

KOHA DITORE

ZËRI INFO

KOSOVA SOT

INSAJDERI

BOTA SOT

GAZETA METRO

GAZETA SINJALI

ALBANIAN POST

KALLXO COM

LAPSI.AL

ZEMRASHQIPTARE

KOSOVA PRESS

TELEGRAFI

EUROPA E LIRË

ZËRI I AMERIKËS

PSIKOLOGJIA

TRIBUNA SHQIPTARE

SHËNDETI

DITURIA

PRESHEVA.COM

GJUHA SHQIPE

KOSOVARJA

RADIOPROJEKT

Intervistoi: Sabir KRASNIQI

E Premte, 13 gusht 2010

Ekskluzivisht për www.sa-kra.ch - bisedë me Qefsere Sokolin – Mësuese e diplomuar e Mendimit Pozitiv.

NXËNËSJA DHE FEMRA E PARË SHQIPTARE,  DHE E VETMJA, MBI DIPLOMËN E SË CILËS NËNSHKRUAN BABAI I MENDIMIT POZITIV DAUT DEMAKU

(pjesa e parë)

            Mendimi pozitiv tani më nuk është shprehje e huaj për askënd, por një frymë e re që po përhapet me shpejtësinë e dritës, jo vetëm në shoqërinë kosovare, por anë e mbanë trojeve ku jeton populli i ndritur shqiptar, anë e  mbanë globit, kudo ku flitet gjuha e bukur dhe e bekuar shqipe.  Por: kush i solli këto shkëndija të arta, që ndezën pishtarin e zjarrtë në zemrat e pasuesve të këtij mendimi të Ri Botëror? Kush e solli këtë dritë madhështore për ta sfiduar, njëherë e përgjithmonë, errësirën e mendjes - për t'i dhënë shkëlqim asaj? Kush e solli këtë frymë të rritës shpirtërore - frymën e MENDIMIT POZITIV?  Një mendje e ndritur e një urtaku, e një shpirti energjik që, me gjithë vështirësitë, pengesat dhe kufizimet, arriti t'i thyej mendësitë arkaike duke i zëvendësuar ato me sintezën më të bukur, më domethënëse dhe më të dobishme që ka mundur ndonjëherë ta mbjell, kultivoj dhe përhapë mendja e njeriut, dhuratën më madhore - hyjnoren, çelësin e artë të suksesit dhe të lumturisë njerëzore... kush tjetër, përpos të madhit, me trup, shpirt e mendje - Daut Demakut!

         Në mesin e shumë e shumë nxënësve të pasionuar që sfiduan veten dhe që e frekuentuan "Qendrën e Mendimit Pozitiv" (të themeluar nga D. Demkau, që në vitin 2000), ndriti edhe një yll i ri - një shpirt i dhënë, që nga thërrmijat më të imta të qenies së saj pas kësaj fryme të re, që e konsideron si dashurinë më të madhe të saj në jetë, si dhuratën më të shtrenjtë hyjnore... një trasuese e rrugës së mësuesit të saj... e që quhet, Qefsere Sokoli.

            Kush është kjo vajzë e re me gjithë këtë pasion të zjarrtë?!

            U lind në Llugë të Podujevës. Shkollën fillore e përfundoi në vendlindje, ndërsa gjimnazin në Podujevë, për të vazhduar më pas me studime në Universitetin e Prishtinës, përkatësisht në Fakultetin Juridik. Paralelisht regjistron edhe Fakultetin e Mjekësisë, për t'i anashkaluar më pas, që te dyja këto drejtime (edhe pse me nota të larta) vetëm e vetëm, për të hyrë në rrugën e dritës së pafund të hyjnisë.

            Në kërkim të kësaj drite hyjnore, gjen Mësuesin e kërkuar dhe ëndërruar... E frymëzuar nga drita e ndritur - OSHO-iste (Bhagëan Shree Rajneesh - filozof indian), e pasionuar pas literaturës inspirative dhe përmes kurseve intensive arrin të diplomoj në vitin 2008 si, "Mësuese e Mendimit Pozitiv", dhe me këtë të bëhet - Femra dhe nxënësja e parë shqiptare, që mbanë këtë titull, që mbi diplomën e saj të ketë vulën vendimtare dhe nënshkrimin e mësuesit të saj D. Demaku.

            Ka gati një vit, që punon edhe për administratën e "American School of Kosova", si dhe përgatitë dhe është autore e një emisioni javor me karakter argëtues, edukativ dhe relaxues, që transmetohet çdo të diel pasdite në TV21, me titull, "Mendo Pozitivisht", në segmente të shkurtra kohore por me domethënie të thellë shpirtërore. Është shumë aktive, jo vetëm në Qendër, por edhe jashtë saj, duke lëvizur nëpër pjesë të ndryshme të Kosovës, dhe ligjëruar e mbajtur kurse të kësaj lënde që, Qefserja dhe Mësuesi i saj, e quajnë, "Arti i Mendimit Pozitiv".

            Ajo krahas Mësuesit të sajë po sjellin një frymë të re në shoqërinë kosovare, frymën e mendimit të ri botëror, frymën e mendimit pozitiv.

            Për web faqen www.sa-kra.ch i morëm këtë intervistë:

            Fillimin e kësaj interviste dua ta nis me një pyetje paksa personale për ju, ndoshta edhe paradoksale! Çfarë energjie ka qenë ajo, që ka ndikuar kaq fuqishëm, që ju t'i anashkaloni studimet, në Fakultetin Juridik dhe atë të Mjekësisë, dhe të përkushtoheni me gjithë qenien tuaj ndaj frymës së re të mendimit pozitiv?

            Q. Sokoli: Ndërsa unë, fillimin e kësaj interviste po e nisi me një përqafim pa fund dhe plot dashuri pa kusht, me frymë hyjnore për të gjithë fansat e kësaj faqeje.

            Cila energji ndikoj fuqishëm... Të parin studim, të dytin studim dhe të tretin e qëllova. Fillova studimet për Juridik, vazhdova me Mjekësi ndërsa diplomova në një drejtim tjetër - Mendimi Pozitiv.

            Gjatë kohës kur bëja studime për Juridik, kuptova se për të bërë rregulla nga jashtë duhet të jesh e rregulluar nga brenda, për të vënë rregulla, rend dhe qetësi në sipërfaqe, duhesh të jesh qetësuar në brendësi... Po ashtu, nga Mjekësia  kuptova se për ta mjekuar pacientin nga plaga e jashtme, do të duhej ta mjekonim plagën nga brenda, për ta shëruar trupin e tij, së pari do të duhej ta shëronim shpirtin e tij. Fillova të kuptoj se nga gjithçka që ke, në rend të parë është njohja e vetvetes, e cila njohje është shumë e vështirë, por më shumë se e mirë.

            Kurrë nuk mund t’i njohësh të tjerët, derisa nuk e ke njohur vetën, kurrë nuk mund të njohësh nga jashtë, nëse më parë nuk ke njohur nga brenda. Më magjepsi kjo frymë e re e të menduarit e cila të kthente kah vetja - në vetvete , për ta parë atë  fëmijën e vogël në ty, atë farën hyjnore përbrenda vetës, atë dritë që ndrinë gjithmonë në ty dhe për ty, e që kurrë nuk shteron, derisa ti ke mundësi për ta parë. Sa më shumë që i afrohesh kësaj drite, aq më madhështore bëhet. Pra, një frymë e re e të menduarit që të ndihmon të jetosh në SOT, në KËTU, në TASH. Ngase  DJE ka ikur dhe nuk do të kthehet më kurrë, ndërsa NESËR është ndoshta, nuk e dimë nëse do vij apo jo, vetëm e TASHMJA është e sigurt!  

            Pra është një kothere e bukës, që po e vure njëherë në çokollatën e shpirtërores, nuk mund të rezistosh dot pa të, është më shumë se e shijshme. Prandaj, ishte një fuqi e jashtëzakonshme për t’u kthyer nga vetja që, edhe e pamundura, dukej se bëhej e mundur.

            Megjithatë, për ta aktivizuar atë "fuqi (energji) të jashtëzakonshme" nevojitet, së paku, një shkëndijë - qoftë ajo edhe shpirtërore... Ku e ka burimin kjo shkëndijë, zanafilla e këtyre thërrmijave  që ju mundësuan të arrini deri këtu -  cila është historia?

            Q. Sokoli: Me këtë literaturë ka disa vite që merrem - mbi 10 vite. Po e ndjejë të them diçka që nuk e kisha thënë asnjëherë publikisht, enkas për këtë faqe, ngase për disa vite me radhë  ushqehem shpirtërisht nga kjo dritare.

            Dihet, gjithmonë ka një fillim, gjithmonë duhet të filloj nga diçka, dhe  para tërë këtij bagazhi të viteve edhe për mua kishte një fillim. Ishte muaji Maj i vitit 2000, kur nga një mike mora një fletore për të rishkruar një poezi që e kishte në fletoren e saj, po ashtu në atë fletore kishte dhe ca aforizma që, si duket, i pëlqeva. Që t’i shkruaja në atë moment nuk pata mundësi, sepse ajo ngutej! Iu luta mikës sime që ta merrja fletoren e saj në shtëpi, por përveç poezisë, të mund t’i rishkruaja edhe aforizmat që ishin aty. Përgjigjja e saj ishte: - Nuk mund të ta jap fletoren, ngase kam diçka shumë-shumë sekrete të shkruar në faqet e pasme të fletores.

            I thash: - Mirë! -Por nëse unë të premtoj që nuk do e hapi fletoren nga pas, por vetëm nga faqet e para, ku mund t’i merrja poezinë dhe aforizmat, çfarë thua ti? U mendua pak  dhe më tha:  - PO, kam besim, për ty do e bëjë!

            I shtrëngova dorën duke i premtuar që do të shfletoj vetëm atë që më takonte, ajo shumë besoj dhe më tha, në dorën tënde janë sekretet e mia - MERRI...

            Unë i mora duke i thënë, dora jote që i mbyll tani, do t’i rihapë serish...

            Mora fletoren në shtëpi për dy ditë. Derisa mikja ime u kthye sërish, e shkrova poezinë, i shkrova aforizmat, por e mbajta edhe premtimin. Më besoni: nuk e hapa nga pas fletoren, dhe ja ktheva pas dy ditësh, duke e falënderuar pafundësisht, jo për fletoren, por për besimin që pati ndaj meje - një rritje e rritjes shpirtërore.

            Në atë fletore një ndër aforizmat ishte edhe kjo: SECILI  ËSHTË  FARKUES  I  FATIT  TË  VETË ...

            Aq shumë më mori me vete kjo thënie sa që, pothuajse çdo kund nëpër kopertinat e mia e gjeja, e e cila thënie më nxirrte shumë pyetje nga brenda:

            -Është apo nuk është  e vërtetë?

            -Si mund njeriu ta bëjë jetën e tij?

            -Si mund ta farkoj fatin e tij?

            -E mundur apo jo ???  Dhe shumë pyetje  tjera të këtij lloji…

            Imagjinojeni si mund ta ndryshoj jetën vetëm një aforizëm!... duke qenë se trishtimin nga lumturia e ndan vetëm një vijë e hollë, kufiri nga e mira dhe jo e mira, është vetëm ndërrim i polit të kundërt. Dhe, kurdo që ndjehesha me rënie shpirtërore, më kujtohej ky afirmim. Për ta përmbushur këtë, pak më vonë, një mik i imi ma solli një libër inspirativ (nga i cili u frymëzova) për të më hapur rrugë në kërkim të kësaj drite të pafund. Nuk u ndala me kaq, ngase ai që heq dorë asnjëherë s’fiton, ai që fiton asnjëherë s’heq dorë. Lexova dhe studiova shumë autorë të huaj të kësaj literature, frymëzim ky të cilin e merrja çdo ditë nga drita e dritës - OSHO-ja.

            Isha e uritur për këtë frymë të re të menduarit. Kërkoja një Mësues dhe e gjeta. E lexova dhe studiova edhe Mësuesin tim Daut Demakun, të cilin akoma nuk e njihja personalisht. I dëgjoja ligjëratat e tij përmes TV dhe radios, dhe gjithmonë e kisha si model për të shkuar tutje, por, prapë kurrë nuk e kisha takuar.

            Një ditë prej ditësh, kur Mësuesi im kërkoj nxënës, isha edhe unë njëra nga ata që kisha kërkuar që mundësisht edhe mua të ma bënte një vend në ligjëratat - kurset e tij. Kisha frikë t’i shkruaj , e ndjeja vetën si një pikë ujë pranë një oqeani të madh të dritës! Dridhesha, por ambicia e mundi frikën... Nëse doni të zhvilloheni, ju duhet t’i bëni ato gjëra të cilave u frikësoheni, kështu që  i shkrova Mësuesit tim. Pas tre herë dështimi të letrës, të katërtën herë e dërgova. ( Nga dhjetëra-mijëra letra që kishin arritur deri atëherë në inboxin zyrtar, letra ime hyri në listën e ngushtë të letrave, e me pas  u zgjodh  si letra më e mirë e të gjitha kohërave deri atëherë, që do të jetë botuar diku në ndonjë nga librat e ardhshëm - ndërsa imagjinojeni: unë kisha kërkuar që letra ime  të mbetej anonime!!! )

            Mësuesi im më  kthej përgjigje pozitive, që më bëri vajzën më të lumtur në botë - moment ky i cili ishte më i madh se sa unë, një rast hyjnor, jo që ishte ndër të veçantit, por u bë ndër më të jashtëzakonshmit. Deri atëherë kisha lëvruar nëpër jetë sikur një fëmijë që ecën labirinteve të xhunglës dhe që duhet të zgjedh, ndërmjet rrugicave, atë më të mirën, ku asnjëherë se di se kë do ta zgjedh. Rruga ime dritësore FILLOJ.

            E kisha shumë të qartë në cilën kahje isha nisur, kështu që ia pash fundin ngjyrave që më parë... Në ditën e parë të ligjëratës, duke bërë shaka, i thash Mësuesit tim:  -Unë do të jem ajo që do ta rrëmbej diplomën, dhe do ta tejkaloj i dashur Mësues. Më shikoj dhe me tha: -Do të jem shume i lumtur por dhe do ta kam zili! Qeshëm që të dy!

            Më pastaj fillova kurset: të Parin, të Dytin, të Tretin... të Katërtin u sfidova me shumë nxënës të tjerë, e të cilët kishin filluar kurset shumë më përpara se sa unë. Arrita të hy në listën e ngushtë dhe më pas në krye të listës dhe fillova të përgatitem për Mësuese të Mendimit Pozitiv. Kalova shumë sfida, ku më pas edhe diplomova dhe u bëra edhe nxënësja e parë dhe e vetme, ku mbi diplomën time ta kem vulën vendimtare dhe nënshkrimin e Mësuesit tim Daut Demakut. Një ëndërr e cila u bë realitet!

Gjatë ligjëratave të mësuesit Daut Demaku në "Qendrën e Mendimit Pozitiv" në Prishtinë

            Ka këtu ndonjë sekret, që ju arritët t'i tejkaloni me sukses të gjitha sfidat dhe të jeni e diplomuara e parë dhe akoma e vetmja nga Mësuesi Demaku dhe, a mund të na thoni cili është ai?

            Q. Sokoli: E kam thënë shumë herë këtë sekret dhe po e ripërsëris - shumë e thjeshtë, mund ta përkufizosh me tri fjalë: KËRKOVA - BESOVA – MORA!

            Shumë shkurt, shumë thjeshtë, shumë saktë. Ndërsa keni tre vite që asistoni vullnetarisht në "Qendrën e Mendimit Pozitiv" - Qendër kjo shumë e njohur, e themeluar që në vitin 2000, nga urtaku dhe mendjendrituri - i madhi Daut Demaku, të cilin unë në një intervistë, me plotë të drejt, e kam quajtur OSHO shqiptar. Mund të na thoni diç më shumë për veprimtarinë e kësaj Qendre, që konsiderohet si një thesar vlerash tejet të çmuara shpirtërore, nga i cili mund të pasurohet secili që zgjatë kokën në atë dritare, dhe ky thesar të mos shteroj asnjëherë?!... 

            Q. Sokoli: "Qendra e Mendimit Pozitiv" kishte funksionuar nga viti 2000, të cilën e kishte formuar Mësuesi im. Kishte filluar me përhapjen e kësaj fryme shumë kohë më parë - para se të vija unë në Qendër, përmes kurseve, ligjëratave, apo edhe emisioneve. Pas disa vitesh, kësaj dritareje të dritës iu bashkëngjita edhe unë. Ka tri vite që asistoj vullnetarisht në këtë dritare të dijes nga brenda dhe përkrah Mësuesit tim. Bëmë përpjekje, rifilluam punën për t'i ndarë këto thërrmija të dritës OSHO-iste që ishin mbledhur aty, me nxënësit tanë, me të rinjtë - të rejat, të vjetrit apo mesatarët, të moshuarit... me tërë njerëzit që frekuentonin Qendrën tonë. Thënë shkurt - me tëre ngjyrat e ylberit që formonin mozaikun tonë të Qendrës. Zhvilluam aktivitete të ndryshme me kurse, ligjërata, gjithmonë duke u bazuar në dokumentarët dhe literaturën inspirative amerikane. Ne patëm përkrahjen e shumë miqve të Qendrës të cilët e ndihmuan Qendrën tonë, e të cilët kurrë nuk lejuan që të përmenden emrat e tyre, sepse nuk e kishin bërë për emër por për shpirt, në mënyrë që ne ta ndajmë këtë energji pozitive me njerëzit, si në  Kosovë, ashtu dhe jashtë saj.

            Keni thënë se "Mendimi pozitiv", është profesioni që ju e doni më së shumti në botë! Është kjo një shprehje e thënë bazuar në këndvështrimin subjektiv, apo vullnet dhe pasion për ta shpërndarë këtë frymë të re, këtë rrugëtim drejt ngritjes shpirtërore, që shpesh po e dëgjojmë të thuhet se është edhe ardhmëria e njerëzimit?

            Q. Sokoli: Punën të cilën e bëni me dashuri, ajo më nuk është punë, ajo shndërrohet në lojë dhe bëhet dashuri. E kush nuk e donë dashurinë?!

            E rëndësishme është që ne ta gjejmë punën të cilën e duam, e e cila punë na dojë edhe neve, atëherë jemi një me atë që duam dhe atë që punojmë, dhe kjo lojë bëhet dashuri. Asnjë njeri nuk është i suksesshëm në punë nëse nuk e do atë që e bënë. Para pak ditësh mora një pushim dy javor, që të merrem, të bëjë dhe të punoj për vetën, mirëpo pushimi im nuk ishte nëpër plazhe, siç jemi mësuar zakonisht ta quajmë pushim, por gjatë kësaj kohe të pushimit, unë, çdo ditë punova 17, 18 dhe 19 orë, me vetëm 2 ose 3 ore gjumë në ditë.

            Mirëpo, kur vinte mbrëmja, disa herë testova vetën. Isha në gjendje të rinisja një ditë re, pa pas pushuar për të nesërmen. Pse?

            Sepse punoja vetëm rreth Mendimit Pozitiv dhe derisa punoja unë relaksohesha dhe çlodhesha. Pra është profesioni të cilin e dua fuqishëm, i cili me jep kurajë dhe më bënë që këtë të mirë pozitive ta ndaj duke e zmadhuar.

            Mendimi Pozitiv nuk te jep mësim, nuk të jep dituri, por ta përkujton që fuqia, dituria dhe mësimi ndodhet  brenda në ty - TI JE BOTA VETË. Ne nuk kemi ardhur në jetë që të jemi kopje e dikujt tjetër, por t'i shfaqim botës veçantinë tonë.

            Dhe kur e kupton që fuqia ndodhet në ty, atëherë edhe jeta të bëhet lojë dhe dashuri. Prandaj nuk thuhet rastësisht që kjo frymë e re e të menduarit është ardhmëria e njerëzimit. Derisa në vendet e zhvilluara përdoreshin me tonelata pilula qetësuese çdo natë, apo narkotik të ndryshëm, për ta sjell qetësinë e brendshme shpirtërore në mënyrë artificiale, tani vetëm se ka Institute të tëra të Mendimit Pozitiv, që në mënyrë natyrale mund ta arrish qetësinë. Derisa mënyra artificiale e qetësisë kushton shumë dhe e cila zgjatë vetëm sa zgjasin përbërësit e "kësaj qetësie", mënyra tjetër nuk kushton asnjë cent.

            Ndryshojeni mendimin tuaj! Sa kushton...?

            Kështu që, nëse ndryshojmë mendimet për të mirë, edhe jeta jonë do të jetë më e mirë, ndërsa nëse vazhdojmë me avazin e vjetër do të jemi po ata të vjetrit.

            Vazhdon...

            Në vazhdimin tjetër, ndër të tjera, do të lexoni:

            A është Mendimi Pozitiv "çelës i artë" që hap portat e lumturisë?

            Për punën në administratën e "American School of Kosova" dhe titullin e bukur "Miss Pozitiv";

            Për emisionin "Mendo Pozitivisht" në "Relax" të TV21-it;

            Për lidhshmërinë e fuqishme me numrin, që konsiderohet si ditë fatkeqe, - 13-in;

            Për planet e "Qendrës..." dhe Qefserës;

            Për mësuesin e madh D. Demaku, etj.

  (lexo pjesën e dytë)