Sakras Art Gallery

Sekuenca filmike

RTK

TOP CHANNEL

RTV 21

ALSAT

TV KLAN

KLAN KOSOVA

BOTA.AL

ALBANIAPRESS

ALBINFO

EXPRESS

KOHA DITORE

ZËRI INFO

KOSOVA SOT

INSAJDERI

BOTA SOT

GAZETA METRO

GAZETA SINJALI

ALBANIAN POST

KALLXO COM

LAPSI.AL

ZEMRASHQIPTARE

KOSOVA PRESS

TELEGRAFI

EUROPA E LIRË

ZËRI I AMERIKËS

PSIKOLOGJIA

TRIBUNA SHQIPTARE

SHËNDETI

DITURIA

PRESHEVA.COM

GJUHA SHQIPE

KOSOVARJA

RADIOPROJEKT

Shkruan: Hydajet BYTYÇI

       SUGJESTIONI DHE - AUTOSUGJESTIONI (2)

       Gjithnjë derisa nuk i kontrollojmë mendimet tona dhe nuk jemi të vetëdijshëm për fuqinë e tyre, të pakrahasueshme, gjithnjë jemi të nënshtruar para asaj fuqie të keqe, e cila në çdo çast mund të invadojë në drejtimin tonë. Kur mendimet do të mësohemi t’i kontrollojmë sipas dëshirës sonë, atëherë atë fuqi të pakrahasueshme shpirtërore mund ta shfrytëzojmë sipas dëshirave tona.

            Mendimi është fillimi i çdo gjëje

            Gjithçka fillon si ide. Lind mendimi mu si një xixë. Nga ai mandej lind përfytyrimi vizual. Vetëm atëherë mund të veprojë sugjestioni – qoftë në hipnozë apo në gjendje të zgjuar, qoftë si autosugjestion apo heterosugjestion. Krejt kjo është manifestim i besimit tonë personal. Domethënë, sugjestionet pranohen apo kthehen varësisht nga fuqia sugjestive e hipnotizuesit dhe ndjeshmëria sugjestive e të hipnotizuarit.

            Tërë jetën tonë e dirigjon vetëdijshëm apo pavetëdijshëm sugjestioni. Po të mos ishte kjo, atëherë çdo propagandim do të ishte i tepërt. Por në ne jo vetëm që ndikojnë të tjerët, por ne pandërprerë ndikojmë në vetveten. Autosugjestioni apo ndikimi mbi vetveten është me shumë rëndësi, madje me rëndësi absolute për jetën tonë; sepse me çdo sugjerim tonin ne farkojmë personalitetin tonë, e me këtë farkojmë dhe përcaktojmë fatin tonë.

            S’duhet kurrë ta përdorim mendimin e keq

            Për këtë arsye, s’guxojmë kurrë ta mbjellim, ta kultivojmë, ta ushqejmë e ta zhvillojmë mendimin e keq, të themi diçka negative. Dhe e kemi për detyrë që çdo mendim të keq, që eventualisht mund të mbillet në ne, menjëherë ta zëvendësojmë me mendimin e mirë, pozitiv, para se ai të ketë filluar të veprojë e të bëjë keq në ne.

            Gjithnjë derisa nuk i kontrollojmë mendimet tona dhe nuk jemi të vetëdijshëm për fuqinë e tyre, të pakrahasueshme, gjithnjë jemi të nënshtruar para asaj fuqie të keqe, e cila në çdo çast mund të invadojë në drejtimin tonë. Kur mendimet do të mësohemi t’i kontrollojmë sipas dëshirës sonë, atëherë atë fuqi të pakrahasueshme shpirtërore mund ta shfrytëzojmë sipas dëshirave tona.

            Prandaj, ta udhëheqim vetëdijshëm sugjestionin tonë, do të thotë ta udhëheqim vetëdijshëm fatin tonë; ta udhëheqësh vetëdijshëm atë që dëshiron, do të thotë ta arrish atë që vërtet dëshiron ta arrish – kështu përafërsisht konkludon njohësi i mirë i këtij lëmi, Kurt Tepervin.

            Prandaj, si detyrë shtëpie s’na mbetet tjetër pos të mësohemi t’i njohim ligjet e sugjestionit, të vetëdijesohemi për fuqinë vepruese të tij dhe jetën tonë të mësohemi ta udhëheqim vetë, vetëdijshëm, me sukses dhe me siguri në vetvete. Sukseset tona duhet të jenë të vetëdijshme. Sepse, krejt çfarë në shpirtin tonë ndikon është sugjestioni. Në momentin kur i nënshtrohemi ndikimit shpirtëror të sugjestionit, në ne lind besimi që atij ndikimi i përgjigjet.

            Sugjestionet duhet të jenë të qarta dhe të figurshme

            Por, derisa jemi këtu, duhet të theksojmë se sugjestioni mund të ndikojë vetëm kur ai shndërrohet në paraqitje të figurshme; domethënë kur aplikohet mendimi figurativ. Mënyra më e mirë për t’i mbjellë sugjestionet është para gjumit, para se të na vijë gjumi, respektivisht mu në fazën kur fillon të na rëndohen sytë nga pesha e gjumit, dhe në mëngjes, menjëherë pas zgjimit, kur truri ende është në gjendjen alfa, e kur mendja emde nuk ka filluar të na vërvitë andej-këndej e të na sjell vërdallë në të kaluarën e në të ardhmen, siç zakonisht bën me ne. Sugjestionet duhet të jenë sa më qartë të vizualizuara, sa më të figurshme. Ndërsa mënyra më e mirë për thellimin e ndikimit të tyre, për ta cytur veprimin e tehut të tyre, është të përsëriturit e tyre; sikur bëhet ujitja e frutave. Sugjestionet domosdo duhet të jenë qartë të formuluara. Para çdo mbjelljeje të sugjestioneve, s’duhet të zgjedhim më shumë se tri sugjestione, por ato duhet të përsëriten shumë herë.

            Sipas njohësve të mirë të këtij lëmi, sukseset dhe mossukseset janë reaksione që mund të mësohen. Vetëm paraqitja figurative, e vizualizuar qartë e suksesit – e punës së suksesshme, e fjalës së suksesshme etj. – dhe, ja, suksesi do të lindë! Anasjelltas, kush identifikohet me mossuksesin e vet dhe thotë: “Këtë unë nuk mund ta bëj, unë jam i këtillë, kjo nuk më shkon” etj. – ai jo vetëm që është i tillë, por i tillë edhe do të mbetet. 

            Nëndija jonë nuk flet me fjalë, por me figura. Intensiteti i paraqitjes që zgjojmë në ndërdije, përcakton emocionin që ka për ta përcjellë veprimin e mëpastajmë.

            Për shembull, e organizojmë vetveten dhe ushtrojmë një frymim të vetëdijshëm. Gjatë atij frymimi (këtu e nënkuptojmë frymëmarrjen dhe frymënxjerrjen) mendojmë, duke e përcjellë mendimin me shfaqje sa më të fuqishme vizuale, domethënë: mendojmë figurativisht se me çdo frymëmarrje të thellë, po e mbushim organizmin me energji dhe fuqi të freskët. Përfytyrojmë më tej sesi kjo fuqi e energji po shpërndahet nëpër tërë trupin tonë. Duke nxjerrë frymën, përfytyrojmë sesi po nxjerrim nga vetja të gjitha të këqijat që dinë të na kaplojnë ndonjëherë e të grumbullohen në ne. Veçse pas 10 frymëmarrjesh të këtilla do të shohim menjëherë sesi sugjestioni i dhënë ka filluar të veprojë.

            Ka njerëz që ndikojnë në mënyrë shumë sugjestive, ndaj lehtë mund t’i bindin edhe të tjerët. Ata janë persona që thellë janë të bindur në aftësitë e veta, së këndejmi lehtë bindin edhe të tjerët. Njeriu që s’i beson vetvetes, s’duhet të presë t’i besojnë të tjerët. 

            Duhet të dimë edhe atë se ka shumë njerëz që dinë të sjellin sugjestione logjike, por që nuk sjellin sukses. Arsyeja: suksesin nuk e sjellin sugjestionet logjike, sado logjike qofshin, por sugjestionet e figurshme, të qarta e të thella vizuale. Dhe, meqë çdo njeri mund të besojë, atëherë secili është sugjestibil.

            Të mësohemi të mbjellim mendime sa më pozitive

            Por, ne, çka është më e keqja, më së tepërmi fuqinë e sugjestionit e shfrytëzojmë për efekte negative; për shembull: shkojmë në kinema dhe, duke u nisur, pëshpëritim: “Po shkoj, veçse ka me më dhimbtë kryet fort” ose: “po i pi këto kokrra, por fare s’janë kah më bëjnë mirë”. Në vend që, anasjelltas, t’ia sugjerojmë vetes të kundërtat e këtyre: “Jam kah i pi barnat dhe fort mirë po më bëjnë” ose “qesh i trullosur, por kur të dal, do të kthjellem” etj.

            Është interesant, po t’i jepnim vetes detyrë t’i vërenim njerëzit sesi ata shprehen gjatë një dite apo sesi shprehen brenda një jave. Do të kishim për t’u habitur sesa negativisht jemi të prirur. Kemi aq shprehje negative, aq sugjestione negative i japim vetvetes, aq sugjestione negative u ndajmë të tjerëve, madje edhe më të dashurve, saqë vërtet, po e shikuam nga prizmi i gjithë kësaj sa u tha deri më tash, do të befasoheshim me botën mendore të njeriut: Është maksimalisht i ndotur me mendime negative, me ide mizore të cilat ua ndan pa ngurrim vetes dhe të tjerëve.

            Na duhet vetëm pak ta rregullojmë mekanizmin e mendjes

            Shembulli më i mirë i kësaj është tregimthi për nënën që kishte dy bijtë e saj zejtarë: Meritoni ishte mjeshtër bakllavash e Petriti çadërshitës. Kur binte shi, ajo bënte “kuku për mu’, Meritonit i prishen petët!” Kur nxente dielli, ajo përsëri bënte “kuku për mu’, sot, Petritit nuk i shiten fare çadrat!” Një ditë, një dashamirës i tha: Mirë që po të dhimbsen bijtë e tu, por vetëm pakëz duhet ta ndryshosh metodën: Kur të bie shi, thuaj “Lumja unë për Petritin, kanë për t’iu shitur të gjitha shiezat (çadrat)”!  Kur të nxen dielli, thuaj: “Lumja unë, sot Meritonit i teren mirë petët”! Pra në të njëjtin person prehen sugjestionet e mira dhe të liga. Është çështje jona se cilat i zgjedhim. Për këtë arsye ne natyra na e dhuroi vetëdijen, që të dimë ta bëjmë zgjedhjen.

            Armiku më i madh i çdo sugjerimi të suksesshëm është dyshimi. Dyshimi është pengesa më e madhe në rrugën e suksesit kah e mira dhe kah e mbara.

            Gjithnjë derisa lëkundemi midis mendimit pozitiv dhe atij negativ (dyshimi është negativ) – nuk mund të përparojmë. Në këtë kontekst shtrohet pyetja: Po mirë, nëse japim sugjestione pozitive, a thua vallë gjithnjë do të kemi vetëm suksese? A do të thotë kjo se po tentuam të kultivojmë sugjestionin pozitiv, ne çdo gjë që do të themi, do të bëhet. Bëhu, dhe do të bëhet, si ndër përralla! Jo, assesi. Kjo nuk duhet të kuptohet në këtë mënyrë. Një kuptim i këtillë është tendencioz dhe jo i drejtë. Nga literatura ne mund të sjellim shembullin e Edisonit. Ky njeri me shpirt të fuqishëm kërkimtar dhe me vullnet të pathyeshëm, para se të zbulonte poçin elektrik bëri rreth tre mijë prova. Kjo do të thotë: 3000 jo-suksese, 3000 dështime, 3000 dëshpërime! Por, tek ai, përherë ka dominuar mendimi pozitiv: “Megjithatë, do t’ia dal! Megjithatë, do të kem suksese!” Dhe vërtet pati sukses.

            Duhet të mësohemi t’i sugjerojmë mirë vetes dhe t’u sugjerojmë mirë të tjerëve

            Sugjestioneve negative kurrsesi nuk duhet t’iu lejojmë që ta luajnë rolin e forcës motorike në jetën tonë. As dyshimit të mos i lëmë hapësirë të sillet në vetëdijen tonë. Ne, fatkeqësisht, kemi mbjellë programe të tilla me baza negative dhe më lehtë iu besojmë sugjestioneve të këqija sesa atyre të mirave. Duhet të mësohemi t’i sugjerojmë mirë vetes dhe po ashtu t’u sugjerojmë mirë të tjerëve. Ta mbjellim farën e së mirës dhe atë do ta korrim kudo që ta hedhim. Këto janë ligje të natyrës, në të cilat nuk ka dilemë. Ç’të mbjellësh, korrë – thotë fjalurta. Duke u sugjeruar mirë vetes dhe të tjerëve, dhe duke jetuar vetë e duke u lejuar edhe të tjerëve të jetojnë, mund t’i shuajmë që në embrion shumë sëmundje, në mënyrë të natyrshme. Madje me këtë metodë mbase mund të ndikojmë edhe atje ku metodat tjera medikamentale nuk kanë dhënë rezultate.

            Të krijojmë truall pjellor për mbjelljen e sugjestioneve

            Njeriu i cili nuk është mësuar të ketë besim në vetvete, nuk mund t’i pranojë as sugjestionet më të mira e më të fuqishme. Dhe kjo ngjan me mbjelljen e fidaneve në tokën e thatë. Toka e thatë, natyrisht se nuk ia mundëson bimës kushtet për jetë. Prandaj, bima nuk do të zërë, assesi. Thjesht, tek njeriu i tillë, i veshur me mburoja dyshimi e dëshpërimi, sugjestioni as që do të mund të depërtojë në qenien e tij.    

             Hipnoza në sferën e shërimit

            Me anë të hipnozës ndikohet fuqimisht në sëmundjet e natyrës psikoemocionale, siç janë belbëzimi, largimi nga disa shprehi të pakëndshme, si devijimet seksuale, përdorimi i alkoolit etj.

            Hipnoza mund të përdoret edhe si opium shpirtëror.

            Kohëve të fundit ka filluar të përdoret në lindjen me lehtësi dhe pa dhembje të femrave shtatzëna, gjë e cila ka qenë ëndërr e miliona femrave anembanë botës.

            Me anë të hipnozës mund të rregullohet gjendjet somnambulistike. Mandej përmes saj mund të ndikohet në sëmundje psikosomatike, siç janë: i thati në lukth, astma, alergjitë astmatike, tensioni i lartë i gjakut.

            Për shembull, ata që vuajnë nga astma bronkiale e dinë mjaft mirë se sulmet rëndom pasojnë pas ndonjë tronditjeje emocionale. Mandej: zemërimi, frikësimi, ofendimi, mosrealizimi të pasioneve, pune të rëndë a ndonjë ngarkese në punë e faktorë tjerë sjellin sulmet astmatike.

            Në shumë pacientë me alergji astmatike është ndikuar duke iu sugjeruar sesi trazimet, ofendimet, dëshpërimet, fyerjet, hidhërimet nuk do të ndikojnë më në frymëmarrjen e tyre.

Përmes kësaj mund të ndikohet edhe në mënjanimin e shumë vuajtjeve të ndryshme, duke përfshirë këtu pagjumësinë, ëndrrat, shumë lloje frikësimesh e fobish, kokëdhembjet e tmerrshme, shprehjet e nervozes, siç janë kafshimi i gishtërinjve, krisja e gishtërinjve, pirja e tepruar e duhanit, të ngrënit dhe të pirit e pamatur, çrregullimi i të folurit funksional dhe efekte tjera të ndryshme negative: vaji i pakontrolluar, turpi i tepruar, padisponimi, pasiguria, impotenca etj.

            Fund

            Nga libri “Libër mbi shpirtin dhe mendjen - çelësi i përndritjes”

(1)