Sakras Art Gallery

Sekuenca filmike

RTK

TOP CHANNEL

RTV 21

ALSAT

TV KLAN

KLAN KOSOVA

BOTA.AL

ALBANIAPRESS

ALBINFO

EXPRESS

KOHA DITORE

ZËRI INFO

KOSOVA SOT

INSAJDERI

BOTA SOT

GAZETA METRO

GAZETA SINJALI

ALBANIAN POST

KALLXO COM

LAPSI.AL

ZEMRASHQIPTARE

KOSOVA PRESS

TELEGRAFI

EUROPA E LIRË

ZËRI I AMERIKËS

PSIKOLOGJIA

TRIBUNA SHQIPTARE

SHËNDETI

DITURIA

PRESHEVA.COM

GJUHA SHQIPE

KOSOVARJA

RADIOPROJEKT

Bhagwan Rajneesh - OSHO

 KJO ËSHTË ÇUDI! (1)

   Të shikuarit e pandërprerë, të menduarit pa ndalim... përsëritja, pra, është metoda themelore në hipnozë. Hipnotizuesi do të ju thotë: “Juve po ju flihet, po fundoseni në gjumë, po fundosuni në gjumë”. Dhe ka për të vazhduar ta përsërisë me po atë të njëjtin zë monoton, që ju më në fund vërtet të flini. Sakaq ai kurrgjë tjetër nuk ju bën, vetëm se e përsërit pa fund e fillim po atë të njëjtën fjali. Kur pa hesap shumë e dëgjoni, ju keni për të rënë në gjumë – jeni të hipnotizuar.

Isai, apo Buda, apo cilido nga krijesat e zgjuara, ka për të ju gjetur të dehur. Dehjet janë të shumta, por dehja është dehje, pavarësisht nga lloji. Ju nuk jeni të zgjuar, nuk jeni të vetëdijshëm, dhe vetëm fantazoni se jeni të tillë – gjumi juaj pandërprerazi vazhdon që nga lindja e deri në vdekje.

Gurxhijevi shpesh e ka rrëfyer këtë rrëfim: njëherë ka ekzistuar njeriu që ka pasur disa mijë krerë dhen, dhe gjithmonë ka pasur telashe, sepse dhentë shpeshherë kanë humbur dhe janë bërë viktima të bishave të egra. Kur brengat i janë kërcënuar se kanë për ta thyer, e ka pyetur një të urtë se ç’duhej bërë.

Këshilla e të urtit ka qenë që t’i gjente qentë-roje. E thënë – e bërë. Njeriu ka siguruar qindra qenë, dhe ata jo vetëm se i kanë ruajtur dhentë, veçse do ta mbytnin secilën që do të provonte të ndahej nga grigja. Dhe: pak nga pak qentë aq janë mësuar të mbysin saqë i kanë mbytur edhe ato dhen që nuk kanë ikur – janë bërë vërtet të rrezikshëm. Për këtë arsye ai erifi ka qenë i detyruar që të këshillohej (përsëri) me të urtin. I ka thënë: “Çështja është bërë serioze, meqë mbrojtësit janë shndërruar në vrasës.”

Kjo ndodh gjithnjë – shikojini pak politikanët tuaj: ata janë qentë – roje, por posa të ndihen të fuqishëm, fillojnë të vrasin.

Shkaku i tërë kësaj i urti i tha: “E, nëse është kështu, atëherë ekziston vetëm edhe një mënyrë e vetme: do të kthehem personalisht tek grigja jote.” Dhe vërtet ka ardhur. Secilën dele veçanërisht e ka hipnotizuar, duke ia thënë sugjestionin vijues: “Ti je e zgjuar, ti je plotësisht e vetëdijshme, je krejtësisht e lirë, dhe kurrkush nuk është pronar yti.”

Kështu që dhentë tash kanë qenë në trans të thellë hipnotik, dhe për këtë arsye tashmë nuk kanë bredhur. Ato nuk kanë për të ikur shkaku se torishten nuk e marrin më se është kufizim, dhe të gjitha besojnë se janë zotër të jetërave të veta. Madje edhe po qe se pronari do ta therrte ndonjërën para syve të tyre, ato do të mendonin: “Ky ka qenë fati i saj – fati i deles, kurse unë jam e pavdekshme dhe mua askush nuk mund të më mbysë. Në mua është uni i pafund, jam plotësisht e lirë, prandaj nuk ka nevojë për të ikur.” Të gjitha dhentë kanë menduar në të njëjtën mënyrë, ashtu që qentë as nuk kanë qenë më të nevojshëm. Njeriu ka qenë i lumtur, meqë të gjitha dhentë kanë qenë nën hipnozë.

Kanë jetuar në atë gjysmëëndërr, e kjo është gjendja në të cilën ndodheni ju. Në këtë gjendje ju ka hasur Isai. Dhe unë po ju njoh si të hipnotizuar. Por, jo: ajo që është e pazakonshme është kjo: ju askush nuk ju ka hipnotizuar – ju jeni në gjendje autohipnoze. Ju jeni njëkohësisht edhe dhentë e hipnotizuara e edhe i urti-hipnotizues. Për këtë, ju thjesht duhet ta nxirrni veten nga kjo gjysmëëndërr.

Metodat e caktuara mund t’i shërbejnë kësaj – t’i shërbejnë thellimit të autohipnozës: nëse pandërprerë e mendoni të njëjtin mendim, ai ju ngashënjen. Gjëja të cilën pandërpreras e shikoni po ashtu ju dirigjon. Duke ëndërruar çkadoqoftë, ju fundoseni në ëndrrën gjithnjë e më të thellë e më të thellë.

Njëherë ka ndodhur që një poet francez të shkonte në Shtetet e Bashkuara të Amerikës. Përcjellësi i cili ia ka prezentuar Nju Jorkun e ka sjellë para Empajer Stejt Bildingut. Poeti e ka shikuar ndërtesën krejtësisht i mahnitur, e pastaj ka thënë: “Paj kjo po ma përkujton seksin!”

Udhëheqësi është shokuar. I ka dëgjuar të gjitha reaksionet e mundshme, por kjo ka qenë diçka krejtësisht e re. Kurrë asnjëri nuk kishte thënë se ndërtesa po ia përkujtonte seksin. Prandaj, e ndieu si detyrim për të pyetur: “Nëse më lejohet, do të ju kisha pyetur: për ç’arsye kjo ndërtesë po jua përkujton seksin?”

“I shërben gjithçkahi!” – u përgjigj francezi.

Nëse pandërpreras mendoni për seksin, hipnotizoheni me të – e atëherë gjithçka është seskuale. Madje, edhe nëse jeni nisur për në tempull, edhe atje mund të gjeni diçka që do të ju vë në linjë me seksin. Ajo, se ku ndodheni, fare nuk është me rëndësi – ju gjithkund e gjeni mendjen tuaj, e ajo e krijon botën rreth jush. Dikush është i hipnotizuar me seksin, dikë e ka preokupuar pasuria, dikë fuqia e shkurtores deri tek gjysmëndrra – por të gjithë ndrydhen nën thundrën e hipnozës. Dhe kurrkush këtë nuk jua ka bërë – për të gjitha jeni vetë fajtorë. Gjendja juaj është vepra juaj personale.

Por jo: ju e bëni këtë pandërprerë aq kohë të gjatë sa thjesht keni harruar se ju vetë jeni edhe magjistari edhe delja  - në të njëjtin çast! Vetëm kur njeriu do ta kuptojë se në të njëjtin moment është edhe sulmuesi edhe viktima, diçka fillon të ndryshojë. Me këtë pikëpamje shkrep xixa e parë e transformimit. Tash nuk mund të jeni siç para këtij këndvështrimi keni qenë, meqë hipnoza ka zënë të zhduket. Pika kritike ka ndodhur, dhe diçka nga vetëdijshmëria ka zënë të hyjë në ju.

Objektet hipnotike mund t’i keni nga më të ndryshme. Gjejeni objektin tuaj personal, atë që më së tepërmi ju tërheq, që është bërë qendra orientuese i qenies suaj. Kur të keni zbuluar se çfarë është në pyetje, vrojtojeni atë, dhe provoni të shihni sesi jeni hipnotizuar me të.

Të shikuarit e pandërprerë, të menduarit pa ndalim... përsëritja, pra, është metoda themelore në hipnozë. Hipnotizuesi do të ju thotë: “Juve po ju flihet, po fundoseni në gjumë, po fundosuni në gjumë”. Dhe ka për të vazhduar ta përsërisë me po atë të njëjtin zë monoton, që ju më në fund vërtet të flini. Sakaq ai kurrgjë tjetër nuk ju bën, vetëm se e përsërit pa fund e fillim po atë të njëjtën fjali. Kur pa hesap shumë e dëgjoni, ju keni për të rënë në gjumë – jeni të hipnotizuar.

Mbajeni në mend këtë, se kjo është ajo që ju pa ndalim po e bëni, e kjo është edhe ajo që shoqëria po jua bën kushdi prej kurit. I tërë mekanizmi i propagandës bazohet mbi të përsëriturit. Politikanët vijimisht e përsërisin po atë të njëjtën, fare pa menduar për atë se – a po i dëgjon kush apo jo! Ata për këtë nuk brengosen; vetëm se vazhdojnë të përsërisin. Por, jo: pak nga pak ju jeni gjithnjë e më të bindur në atë që politikanët e thonë, ju është mbushur mendja. Dhe atë jo logjikisht, në mënyrë racionale – ata nuk ofrojnë kurrfarë argumentesh – jeni sugjestionuar me ndihmën e përsëritjes vrasësisht të mërzitshme, dhe ajo ka krijuar një gjendje plotësisht hipnotike.

Hitleri pa pushim ka përsëritur: “Hebrenjtë janë shkaku kryesor për mjerimin gjerman, për fatkeqësinë dhe pësimet e perandorisë gjermane. Problemi do të zhduket vetëm kur hebrenjtë kanë për t’u zhdukur. Ju jeni racë e veçantë, sundimtarë të botës; keni ardhur në botë për ta sunduar atë, ju jeni raca e sundimtarëve.” Bile as miqtë e tij nuk i kanë besuar – por vetëm në fillim. Çka është edhe më e pazakonshme, as ai vetë nuk u ka besuar fjalëve të veta, por, po e përsëris, vetëm në fillim, pasi që kjo ka qenë një rrenë aq qesharake.

Por, sido që të ketë qenë, ai ka vazhduar. Pak nga pak njerëzit kanë zënë të besojnë se këtu ka diçka – janë bërë dele të hipnotizuara. “Pasi që miliona njerëz po besojnë në këtë, duhet të ketë ndonjë të vërtetë në fjalët e Hitlerit...” Atëherë edhe miqtë e tij kanë filluar të besojnë – ka qenë ajo hipnozë e pastër reciproke, ashtu që më në fund e tërë Gjermania ka qenë e sugjestionuar nga litanitë hitleriane.

Njëra nga racat më inteligjente është sjellë në mënyrë idiotike. Pse? Çfarë i ka ndodhur kështu mendjes gjermane? Shkurt e qartë: të përsëriturit, propaganda. Hitleri në autobiografinë e vet, në Mein Kampf ka thënë se shndërrimi i rrenës në të vërtetën është proces shumë i thjeshtë dhe i zakonshëm: vetëm përsëriteni pandalimisht atë të njëjtën rrenë – kurse ai këtë e ka ditur edhe nga rasti i vet. Vazhdo ta përsëritësh po atë të njëjtën gjë; bëjeni atë për çdo ditë, dhe kjo më në fund shndërrohet në trans hipnotik. Atëherë, madje edhe po ta kuptonit se kjo është e pakuptimtë, marroqe, qesharake, e rrezikshme për shëndetin... kurrgjë nuk ndihmon, pasi që kjo tashmë është autohipnozë e zhvilluar plotësisht bukur.

Gruaja e Mulla Nastradinit i ka lexuar Mullës njëfarë artikulli kundër pirjes së duhanit, në të cilin ka shkruar sesi shkencëtarët si dhe ekspertët e mëdhenj kanë argumentuar që me pirjen e duhanit krijohet bazë e mirë për kancerin, për tuberkulozën si dhe për shumë sëmundje të tjera. Nasradini për njëfarë kohe e ka dëgjuar, por kur më nuk ka mundur të përmbahet, i ka piskatur: “More maft më me këto budallallëqe, të lutem. Krejt kjo është e pakuptimtë, dhe, unë të them, se kam për të vazhduar të pi duhan gjithnjë derisa nuk vdes!”

“Në rregull!”, ia ktheu gruaja gjakftohtë, “bëj si të duash. Por prej nga ke për ta ditur se atëherë po e ndërpren? Si mund të jesh i sigurt se, kur të vdesësh, do ta ndërpresh pirjen e duhanit?”

Dhe vërtet, nëse jeni nën hipnozë, ajo gjë kurrë nuk ndërpritet. Vdekja asgjë nuk ndryshon: në jetën tjetër marrëzia vazhdon me forcë të pazvogëluar, meqë jeta tjetër zë fill nga përfundimi i inkarnimit të mëparmë, ajo është kontinuitet. Domethënë, kur fëmija lind, ai në të vërtetë edhe nuk është fëmijë, por ai është shumë, shumë i vjetër, gjegjësisht i lashtë. Tërë karmën e vet ai e bart me vete, të gjitha samskar-et e veta, të gjitha kushtëzimet. Fëmija ia fillon gati si plak – ai i ka mbetjet e veta personale hipnotike – kjo është ajo që hindusët që nga lashtësia e kanë quajtur karmë, samskara.

Ç’është karma, dhe cili kuptim më i thelli fshihet prapa teorisë për karmën? Karma është mënyrë e autohipnozës. Në qoftë se pandërprerazi e përsëritni një aksion, me kohë ai thjesht ju magjeps, dhe atëherë karma, pra aksioni, bëhet sundimtar juaji. Me fjalë të tjera, ju me kohë bëheni robër të aktiviteteve tuaja.

Çfarë keni realizuar përmes seksit? Vallë, a keni përfituar vërtet diçka përmes tij? Apo është kjo një përsëritje e pakuptimtë? Po: ju këtë të njëjtën gjë e keni përsëritur aq shumë herë, saqë tash, po ta ndërprisnit, do ta kishit ndjenjën se diçka po humbisni. Nëse vazhdoni, e shihni se nuk po fitoni asgjë. Nëse me vazhdimin e aktivitetit seksual asgjë nuk fitohet, atëherë jini të sigurt se asgjë nuk keni për të humbur nëse e ndërpreni këtë. Por, pse në përgjithësi ta keni ndjenjën se diçka po ju mungon? Përgjigjja është e thjeshtë: është në pyetje të kushtëzuarit, samskara. E keni përsëritur atë aq shumë saqë tash absolutisht jeni të hipnotizuar me të. Tash duhet ta përsëritni, krejt kjo është e detyrueshme, një trajtë obsesioni.

Njeriu ha diçka, edhe pse e di se ajo nuk i bën mirë, edhe pse shkaku i kësaj shprehie është gjithnjë i sëmurë. Por, jo: dosido, kur të ulet në tavolinë nuk mund ta ndalë veten – e tërë çështja është bërë e detyrueshme. E çfarë është ai detyrim? Shkaku se atë të njëjtën gjë e ka përsëritur një milion herë, personi thjesht është i hipnotizuar me të. Aktiviteti e ka bërë të dehur.

Një natë Mulla Nastradini vërtet është kthyer vonë në shtëpi; duhet të ketë qenë rreth orës tre. Ka trokitur në derë, kurse gruaja ka qenë pabesueshmërisht e tërbuar. Duke e vënë re se në ç’gjendje ishte, Nasradini ka bërtitur: “Prit, prit të lutem! Së pari m’i jep pesë minuta kohë të sqaroj si është puna, e atëherë fillo e kazdis. Kam qenë ta vizitoj mikun tim të sëmurë.”

Gruaja iu përgjigj: “Ah, ky është rrëfim tronditës! Pa më thuaj, të lutem, sesi quhet ky miku yt i sëmurë?”

Nasradini ka menduar e menduar e menduar, dhe atëherë, përfundimisht, në mënyrë triumfale ka bërtitur: “Po ka qenë aq shumë i sëmurë sa nuk ka mundur të ma thotë!”

            Mendja, nëse është e dehur, mund të gjejë përgjigje të llojllojshme, por krejt kjo është e pakuptimtë, mu si edhe përgjigjja e Nasradinit: “Po ka qenë aq shumë i sëmurë sa nuk ka mundur të ma thotë!” Për seksin do të gjeni justifikime, edhe për gjakimin çmendurak pas pushtetit, por të gjitha këto përgjigje ju gjymtojnë. Fakti themelor përbëhet nga pagatishmëria juaj që t’ia pranoni vetes sesi e tërë çështja është bërë obligative. Ju tashmë jeni viktimë e obsesionit tuaj, robër të autohipnozës.

            Vazhdon...

  (2)      (3)     (4)     (5)